Anastasia Romanowna

Hierdie naam is volgens die Oos-Slawiese gebruik; die patroniem is Romanowna en die van is Zacharina-Joerijewa.

Vir die dogter van keiser Nikolaas II van Rusland, sien Groothertogin Anastasia Nikolajewna van Rusland.

Anastasia Romanowna Zacharina-Joerijewa (Russies: Анастасия Романовна Захарьина-Юрьева) (1530 - 7 Augustus 1560) was die eerste vrou van Iwan die Verskriklike van Rusland en die land se eerste tsarina. Sy was die dogter van die bojaar Roman Joerijewitsj Zacharin-Joerijef, van wie die Romanof-dinastie van Russiese monarge sy naam gekry het, en sy vrou Oeljana Iwanowna Karpowa.

Huwelik en invloed wysig

Sy is uit ’n groot groep meisies as bruid vir Iwan gekies. Al die adellike families van Rusland is genooi om hul hubare dogters na die Kremlin te bring sodat Iwan ’n vrou kon kies. Hy en Anastasia is op 3 Februarie 1547 getroud. Hulle het ses kinders gehad: Anna, Maria, Dmitri, Iwan, Jewdokia en Fjodor.

Daar word wyd geglo dat Anastasia ’n kalmerende uitwerking op Iwan gehad het. In die somer van 1560 word sy siek en sterf ná ’n lang lyding. Iwan gaan daarna geestelik agteruit; hy glo dat die bojare sy geliefde vrou vermoor het. Hy het geen bewyse nie, maar laat nogtans verskeie van hulle martel en teregstel. Hy het toe reeds ’n groot afkeer van die bojare gehad omdat hulle hom as kind so sleg behandel het.

Toe argeoloë en forensiese kenners Anastasia se bene in die laat 20ste eeu ondersoek, het hulle bewyse gekry dat Iwan se vrese dat sy vergiftig is, dalk nie ongegrond was nie.[1]

Erflatenskap wysig

Anastasia se broer, Nikita Romanowitsj, was die pa van Fjodor, die eerste mens wat die van Romanof (seun van Roman) aangeneem het. Fjodor Romanof was dus die neef van die laaste Rjoerik-tsaar, Fjodor I. Dit was een van die redes dat Fjodor Romanof se seun Michail ná Rusland se Tyd van Beroeringe verkies is tot eerste tsaar van die Huis van Romanof.

Verwysings wysig

  1. "battery.ru". Geargiveer vanaf die oorspronklike op 22 Maart 2007. Besoek op 14 Februarie 2008.