Andrei Konstantinowitsj Loegowoi (Russies: Андре́й Константи́нович Лугово́й; geb. 19 September 1966, Bakoe, Azerbeidjan) is ’n Russiese politikus en sakeman, asook ’n afgevaardigde in die Staatsdoema van Rusland. Hy is ’n voormalige KGB-lyfwag en die oud-hoof van ’n sekuriteitsmaatskappy.

Andrei Loegowoi
Gebore
Андре́й Константи́нович Лугово́й

23 Januarie 1946
NasionaliteitVlag van Rusland Rusland
Beroeppolitikus, sakeman, afgevaardigde in die Staatsdoema

Hy word deur die Britse polisie gesoek onder verdenking van die gifmoord op Alexander Litvinenko. Rusland het die aansoek om hom uit te lewer geweier.[1]

KGB en sekuriteit wysig

Loegowoi het die militêre akademie van die Sowjetunie bygewoon[2][3] en in 1987 by die KGB aangesluit waar hy ’n lyfwag was vir ’n paar ministers en ander hoës. In 1996 het hy bedank en in die private sekureiteitsektor gewerk. Hy was jare lank hoof van sekuriteit by die private televisiemaatskappy ORT. In 2001 is hy in hegtenis geneem en daarvan aangekla dat hy die ontsnapping gereël het van Nikolai Gloesjkof, ’n voormalige adjunk-direkteur-generaal van die vliegkorporasie Aeroflot wat in 2000 in hegtenis geneem is in verband met bedrog.

Vergiftiging van Alexander Litvinenko wysig

Loegowoi het Alexander Litvinenko ontmoet op die dag dat Litvinenko siek geword het (1 November 2006). Litvinenko is later dié maand dood van bestraling deur vermoedelik polonium, en op 22 Mei 2007 het Britse amptenare Loegowoi aangekla van Litvinenko se moord en aangekondig hulle sal sy uitlewering van Rusland vra. Rusland het geweier om Loegowoi uit te lewer en gesê die Russiese grondwet laat dit nie toe nie. Rusland het verder gesê hulle sal self die saak opneem as Brittanje getuienis teen Loegowoi kan verskaf, maar Brittanje het nagelaat om dit te doen.[4]

Daarna het Loegowoi baie gewild geword in Rusland. Hy het Britse intelligensie-agente daarvan beskuldig dat hulle agter die moord sit en beweer MI6 het hom probeer werf om op Rusland te spioeneer.[5]

Politieke loopbaan wysig

Nadat die belangstelling in Loegowoi toegeneem het weens die Litvinenko-moord, het Wladimir Zjirinofski, leier van die Liberaal-Demokratiese Party van Rusland (LDPR), op 15 September 2007 aangekondig Loegowoi sal net onder hom wees op die party se lys van kandidate vir 2007 se Staatsdoema-verkiesing. Dit het beteken dat Loegowoi in Desember 2007 ’n parlementslid kon word en dan aanspraak sou kon maak op parlementêre immuniteit.[6] Loegowoi het bevestig hy gaan aan die verkiesing deelneem[7] en gesê hy het sy oë op die amp van president.[8] Loegowoi is toe wel tot die parlement verkies.

Op 13 Maart 2009 het die LDPR aangekondig dat hulle Loegowoi wil benoem vir die burgemeestersverkiesing in Sotsji.[9] Op 24 Maart het Loegowoi egter aangekondig hy gaan nie staan nie en sal eerder ’n lid van die Staatsdoema bly.[10]

Verwysings wysig

  1. No UK charges against Russian oligarch who called for 'revolution'", The Guardian, 07-05-2007.
  2. Prime suspect
  3. Луговой: Сейчас я – заметная фигура (ru)
  4. RIA Novosti. Lugovoy says innocent, Berezovsky behind Litvinenko murder
  5. "Russia Refuses To Extradite Spy Suspect |Sky News|World News". Geargiveer vanaf die oorspronklike op 13 Julie 2007. Besoek op 14 Maart 2012.
  6. Lib Dems say Lugovoy will contest Duma seat Geargiveer 23 Oktober 2007 op Wayback Machine Russia Today. 15 September 2007
  7. Litvinenko murder suspect confirms plans to stand for election RIA Novosti. 16 September 2007
  8. Lugovoy Running For Parliament, Eyes Presidency Radio Free Europe. 17 September 2007
  9. Gorodetskaya, Natalya (14 Maart 2009). "Партия отправляет Андрея Лугового на курорт" (in Russies). Kommersant. Geargiveer vanaf die oorspronklike op 29 Oktober 2010. Besoek op 18 Maart 2009.
  10. "Lugovoi drops out of mayoral race". BBC News (in Engels). 24 Maart 2009. Geargiveer vanaf die oorspronklike op 5 Februarie 2020. Besoek op 25 April 2010.

Eksterne skakels wysig