Anton Nel (gebore op 29 Desember 1961) is 'n Suid-Afrikaanse klassieke pianis.

Biografie wysig

Nel was gebore in 'n Afrikaanssprekende gesin in Johannesburg, Suid-Afrika. Hy het sy debuutuitvoering na slegs twee jaar se studie op 12-jarige ouderdom gemaak met die speel van Beethoven se Klavierconcerto No.1 in C-majeur. Hy was 'n student van Adolph Hallis gewees, en het voortgegaan om verskeie eerbewyse in Suid-Afrikaanse nasionale kompetisies tydens sy tienerjare te wen. Hy het uitvoerig deur die land getoer en 'n bekende radio - en televisie persoonlikheid geword.

Nel het in 1982 gegradueer aan die Universiteit van die Witwatersrand in Johannesburg. Hy het in 1983 na die V.S.A verhuis, waar hy die Universiteit van Cincinnati bygewoon het en meesters - en doktorale grade onder Bela Siki en Frank Weinstock verwerf het. Hy is op 23-jarige ouderdom aangestel aan die fakulteit van die Universiteit van Texas by Austin, welke aanstelling gevolg was deur professorate by die Eastman-musiekskool en die Universiteit van Michigan waar hy voorsitter was van die klavierdepartement. In 2000 was Nel aangestel as die Priscilla Pond Flawn Regents Professor van klavier en kamermusiek by die Universiteit van Texas by Austin waar hy aan die hoof staan van die Afdeling vir Klawerbord-studies. In 2010 het hy die eerste houer van die Joe R. en Teresa Lozano Long Klavier-stoel geword.

Nel was in 1987 die wenner van die Naumburg Internasionale Klavierkompetisie by Carnegie Hall gewees. Hy het ook verskeie pryse gewen tydens die Joanna Hodges Internasionale Klavierkompetisie in Palm Desert in 1986.

Nel is 'n bekroonde interpreteerder van Beethoven, en het tydens verskeie geleenthede Beethoven se concerto-siklus opgevoer, waarvan die mees noemenswaardigste geleenthede twee opeenvolgende uitvoerings saam met die Kaapse Filharmoniese Orkes in 2003 was. Hy het saam met die Cleveland Simfonieorkes, die simfonieë orkeste van Chicago, San Francisco, Seattle, Detroit, en Londen, en vele meer opgetree. Nel beskik oor 'n aktiewe repertorium van meer as honderd werke vir klavier en orkes, insluitende die nuut-ontdekte Klavierconcerto No. 3 in E Mineur deur Felix Mendelssohn waarvan hy in 1997 die Noord-Amerikaanse debuutuitvoering gegee het.

Nel het reeds drie solo CDs opgeneem en het ook verskeie kamermusiek opnames gemaak. Onlangse vrystellings sluit in "Anton Nel in Recital", die volledige Beethoven-sonates en Variasies vir Klavier en Tjello, sowel as die Brahms-sonates en Hongaarse Danse (met Bion Tsang) op die Artek Recordings-plate-etiket (met verspreiding deur Naxos en sy uitvoerings van die Fauré Ballade en die Simfoniese Variasies van Franck saam met die Philharmonia Virtuosi op die ESS.A.Y plate-etiket.

Persoonlike lewe wysig

Nel het in 2003 'n Amerikaanse burger geword.

Eksterne skakels wysig