Wikipedia

Bles Bridges

Suid-Afrikaanse musikant (1947-2000)

Bles Bridges (22 Julie 1946 – 24 Maart 2000) was 'n legendariese Afrikaanse sanger wat hoofsaaklik minneliedjies gesing het. Hy is bekend vir liedjies soos Ruiter van die Windjie, Op die vlerk van 'n spierwit duif, Maggie en Sweef soos 'n arend.[1] Hy was die eerste Afrikaanse sanger wat in die Superbowl by Sun City opgetree het (in 1987) en was bekend vir die rose wat hy by konserte uitgedeel het, asook vir sy buite-egtelike verhouding in 1990. Hy is in 2000 in 'n motorongeluk oorlede.[2]

Bles Bridges
GeboortenaamLawrence John Gabriel Bridges
Ook bekend asBles
Gebore22 Julie 1946
Viljoensdrif
Sterf24 Maart 2000
Bloemhof
Beroep(e)Sanger
InstrumenteStem
Jare aktief1982–2000
EtiketteEMI/Nolina/Brigadiers/BMG/Unika

Biografie wysig

Lawrence John Gabriel Bridges is op 22 Julie 1946 op Viljoensdrif gebore en het sy skoolloopbaan aan die Hoërskool Vereeniging voltooi. Sy bynaam, Bles, is deur sy Ierse oupa aan hom gegee omrede hy op vroeë ouderdom min hare gehad het.[3] In 1972 neem hy 'n langspeelplaat saam met Minnie van Heerden op. Die regisseur van die plaat, Corrie Myburgh, wat later met die sangeres Cora Marie sou trou, was van mening was dat die naam "Bles" nie byval by die publiek sou vind nie. Gevolglik is die album onder die titel Morné en Marié sing vrygestel, maar dit was egter nie ’n sukses nie.

Sy solo-debuutalbum, Onbekende Weermagman, is 10 jaar later in 1982 uitgereik. Sy beroepsloopbaan begin egter eers in 1984 met die uitreiking van sy tweede album, Bles, wat binne minder as 'n maand goue status verwerf het (meer as 25 000 kopieë verkoop). Die album het die bekende liedjie Maggie ingesluit.

In die 1980's het hy 'n konsert ter ondersteuning van die AWB se Volkhulpskema gehou waartydens R10 000 ingesamel is. Hy het ook in die 1980's kanker gehad en het na sy herstel ruim skenkings aan liefdadigheid en kankernavorsing gemaak. Sy vrou, Leonie, was sy klankingenieur en die komponis en/of skrywer van die meeste van sy liedjies, waaronder treffers soos "Maggie" en "I am the Eagle, you're the Wind". Dit was sy gewoonte om 'n paar rose tydens sy konserte aan vroulike lede in die voorste ry van die gehoor uit te deel. Leon Schuster het Bles 'n poets gebak toe hy homself per geleentheid as 'n Afrikanerdame vermom, en chaos veroorsaak het toe Bles nie vir hóm 'n roos wou gee nie. Alles was natuurlik verfilm (vooraf georkestreerd) en die episode is in Schuster se trefferfliek, Oh Schucks... Dis Schuster! (1989) gebruik.

Bridges se grootste treffer was Ruiter van die Windjie, wat in 1986 vrygestel is. 'n Hoogtepunt in sy loopbaan was op 14 en 15 November 1987, toe hy voor 'n uitverkoopte 8000-sitplek Superbowl by Sun City opgetree het. Hy het die naweek vyf vertonings gelewer. Dit maak hom die eerste en enigste kunstenaar nog wat dit kon regkry. Hy het selfs 'n groter skare as Frank Sinatra in 1982 getrek.

Op 24 Maart 2000 is hy in 'n motorbotsing oorlede. Hy is op 3 April 2000 uit die NG gemeente Driehoek in Vanderbijlpark begrawe. Hy laat sy ouers (Cecil en Maria), sy vrou (Leonie), sy dogter (Sunette), sy seun (Victor) en twee kleinkinders agter.[4] Ten tyde van sy dood het Bles reeds meer as 2,6 miljoen albums (plate en CD's) verkoop.

Gerrie Pretorius reik in 2007 'n album genaamd Ek sing vir jou Bles ter nagedagtenis van Bles Bridges uit.

Diskografie wysig

Albums vrygestel (Rekords en CD's):

  • "Onbekende Weermagman", 1982
  • "Bles", 1984
  • "Uit die boonste rakke", 1985
  • "Vir een en almal", 1986
  • "I am the eagle, you're the wind", 1986
  • "Reik na die sterre", 1987
  • "Fight for love", 1987
  • "Laat my lewe, laat my liefhê", 1988
  • "Ons eerste ontmoeting", 1989
  • "Nog 'n nuwe dag", 1989
  • "The devil and the song", 1989
  • "Let me love you", 1990
  • "Back on my feet again", 1991
  • "Soos nooit tevore", 1992
  • "Am I that easy to forget", 1993
  • "One dance with you", 1994
  • "Grootste treffers", 1994
  • "Sproetjies kom terug", 1995
  • "Love and roses – my greatest hits", 1996
  • "Die hart van my moeder", 1997
  • "Sweef soos 'n arend", 1998
  • "Classics my way", 1998
  • "Country my way", 1999
  • "Goue & platinum treffers deur die jare heen", 2000
  • "Môre bring 'n nuwe dag", 2000
  • "Goue & platinum treffers deur die jare heen (vol II)", 2000 (uitgereik op 26 September 2000)

Videografie wysig

Bles het twee video's vrygestel:

  • "In Search Of Love"
  • "Op Toer Met Bles"

Filmografie wysig

Bles het in 1989 in 'n rolprent "The Devil And Song" gespeel. Hy het ook die temaliedjie van die rolprent Tawwe Tienies (1984) gesing.

Verwysings wysig

  1. ↑ Bles sal steeds "soos 'n arend sweef..."; Hy gaan vir Suid-Afrika word soos Elvis Presley, Beeld, 27 Maart 2000.
  2. ↑ HAT Taal-en-feitegids, Pearson, Desember 2013, ISBN 978-1-77578-243-8
  3. ↑ (af) Bles Brdiges: 15 jaar later, Maroela Media, 24 Maart 2015. URL besoek op 22 Julie 2015.
  4. ↑ Bles gewaarsku oor slegte pad, Beeld, 27 Maart 2000.

Sien ook wysig

Eksterne skakels wysig

Ontsluit van "https://af.wikipedia.org/w/index.php?title=Bles_Bridges&oldid=2515100"