Bloemspruit

Die Bloemspruit vloei deur Bloemfontein, hoofstad van die Vrystaat. Die stad het waarskynlik sy naam aan die riviertjie ontleen.

Bloemspruit
Stroomgebied	Vrystaat, Suid-Afrika
Oorsprong	tussen die woonbuurte Brandwag en Westdene
Monding	Renosterspruit Bloemfontein
Oorsprong-hoogte	1 332
Monding-hoogte	1 286
Bloemspruit
Koördinate: 29°5′55.28″S 26°19′48.65″O

Die rivier ontspring tussen die woonbuurte Brandwag en Westdene. Daarna vloei die water ooswaarts deur die middestad en via die Renosterspruit, Modderrivier (deur die Krugersdriftdam) en die Rietrivier na die Vaalrivier.

Met die stigting van die dorp het die standhoudende fontein in die dorpskern 450 000 liter water per dag gelewer. Ná die groot vloed van 1875 het dit nagenoeg halveer. Op 17 Junie 1904 is die laagliggende dele van die stad weer deur die Bloemspruit oorstroom. Tagtig mense het verdrink, honderde is dakloos gelaat, tweehonderd geboue is beskadig of totaal vernietig en brûe is weggespoel. Weens die vloede het 'n groot donga in die middestad ontstaan. Daarna is die area rondom die oog geplavei, sewe brûe is gebou en die spruit in die omtrek van die oog gekanaliseer. Teenswoordig bestaan die fontein nie meer nie, maar 'n gedenksuil met die stadswapen dui sy oorspronklike plek aan. In 1964 is 'n gedenkplaat aangebring.

Bronne

• Oberholster, J.J. (red.): Die Historiese Monumente van Suid-Afrika. Kaapstad: Kultuurstigting Rembrandt van Rijn, 1972. ISBN 0-620-00191-7
• Standard Encyclopaedia of Southern Africa, deel 2. Kaapstad: Nasou, 1970.