Die Bolsjoi-ballet (Russies: Балет Большого театра; Bolsjoi beteken 'groot' in Russies) is ’n beroemde Russiese skool en teater vir ballet in Moskou.[1] Die skool is in 1776 gestig en is een van die oudste balletgeselskappe ter wêreld. Dit bereik wêreldwye erkenning in die vroeë 20ste eeu, toe Moskou die hoofstad van Sowjet-Rusland word. Die Bolsjoi-ballet word saam met die Mariinski-ballet in Sint-Petersburg as die belangrikste balletgeselskappe in Rusland erken.

Die Bolsjoi-teater in Moskou
Soliste van die Bolsjoi-ballet op die Schiphol-lughawe, 9 Junie 1960.

Bolsjoi-ballet was die eerste vaste balletgeselskap in Moskou en is in 1776 deur prins Pieter Oeroessof en die Engelse akrobaat Maddox gestig. Die ballet se optredes is aan die begin in die privaatvertrekke van die prins opgevoer. In 1780 vestig die balletgeselskap hom in die Petrofski-teater. Toneelstukke, ballet- en opera-voorstellings is hier aangebied. In 1805 brand die Petrofski-teater egter tot die grond af.

Die teater is in 1825 heropen en na die Bolsjoi-teater hernoem. Slegs opera- en ballet-voorstellings is in die nuwe teater opgevoer. Klassieke ballet en opera is as verfynde en hoogstaande kunsvorme beskou. Die opvoering van toneelstukke het minder aansien geniet en is daarom na die Mali-teater (Mali beteken dan ook 'klein' in Russies) geskuif. In 1853 is die Bolsjoi-teater weer ernstig in 'n brand beskadig. Die argitek Cavos herstel die gebou en bring ryke versierings aan die binnekant aan. In 1856 open die vernuwe Bolsjoi-teater. Dit is tot vandag die balletgroep se tuisbasis.

Die Bolsjoi-ballet het tydens die Sowjetperiode hoofsaaklik in Moskou opgetree. Hulle tree in 1956 vir die eerste keer buite die Sowjetunie op. Hulle eerste optrede in Wes-Europa was in die Royal Opera House in Londen. Vandag toer die groep hoofsaaklik deur die wêreld en is selde meer in die Bolsjoi-teater in Moskou te sien.

Verwysings wysig

  1. HAT Taal-en-feitegids, Pearson, Desember 2013, ISBN 978-1-77578-243-8

Eksterne skakels wysig