Breedekloof
Die Breedekloof is een van drie wyndistrikte in die Breëriviervallei-wynstreek. Dit spog met 'n totaal van 28 wynkelders (11 produsentekelders en 17 privaat kelders). Die Breedekloof verteenwoordig 14,24% (13 029 hektaar) van Suid-Afrika se aanplantings van wyndruiwe-wingerde. Die meerderheid tradisionele kultivars kan in die Breedekloof gevind word, waarvan Chenin Blanc die algemeenste is.[1]
Ligging wysig
Die Breedekloof wyndistrik is geleë tussen Worcester en Paarl en vorm deel van die Breedevallei Plaaslike Munisipaliteit. Dit sluit die Rawsonville, Slanghoek, Goudini en Breërivier gebiede in. Die weste en suidweste van Breedekloof grens aan die Slanghoek- en Du Toitskloofberge en in die noordooste aan die Hexrivierberge.
Klimaat en geografie (terroir) wysig
Die Breedekloof word gekenmerk deur 'n wye verskeidenheid van terroirs. Die streek grens aan twee bergreekse en lê tussen die Atlantiese Oseaan en die Klein Karoo. Die grond in die Breedekloof wissel van diep, swaar, swart grond tot sanderige skalie-grond in ou rivierbeddings. Hierdie unieke kombinasie van grond en klimaat maak dit 'n gunstige terroir vir wynproduksie. Die vallei ontvang 'n jaarlikse winterreënval van +/- 700 mm wat dit as 'n hoë-reënvalgebied in Suid-Afrika klassifiseer.[2]
Ekonomiese aktiwiteite wysig
Die belangrikste ekonomiese aktiwiteit in die Breedekloof is landbou. Die streek is tradisioneel 'n wyn-produserende gebied, maar perskes, pruime, pere en ander gewasse word ook verbou. Toerisme is 'n ontluikende bedryf in die gebied met gastehuise en onthaalfasiliteite wat nuwe geleenthede bied.
Breedekloof-wynroete wysig
Die Breedekloof-wynroete is die jongste wynroete in Suid-Afrika en is in 2002 gestig.[3] Die roete bestaan uit 22 kelders en strek wes tot oos vanaf Gouda tot Montagu en noord tot suid vanaf Tankwa Karoo Nasionale Park tot McGregor. Dit vorm deel van Roete 62, die langste wynroete ter wêreld.[4]
| Breedekloof Wynkelders (seleksie) |
|---|
| Badsberg Kelder |
| Bergsig Landgoed |
| Botha Kelder |
| Deetlefs Landgoed |
| DuToitskloof Kelder |
| Jason’s Hill Privaat Kelder |
| Goudini Kelder |
| Kirabo Privaat Kelder |
| Lateganskop Kelder |
| Merwida Kelder |
| Mountain Ridge Kelder |
| Rico Suter Landgoed |
| Opstal Landgoed |
| Slanghoek Kelder |
| uniWines Wingerde |
| Waboomsrivier Wynkelder |
Breedekloof Wynfees – Soetes & Sop wysig
Soetes & Sop is 'n jaarlikse wynfees wat georganiseer word deur Breedekloof Wyn en Toerisme Kantoor in Rawsonville.[5] Die fees vind tipies in Julie plaas en alle deelnemende kelders (14 in 2016) is oop vir die geleentheid. Dit is 'n gedesentraliseerde fees: besoekers koop 'n kaartjie met 'n wynglas en sopbeker wat hulle kan gebruik op die wyne en sop by elke kelder te proe. Besoekers het die geleentheid om 'n wye verskeidenheid multi-bekroonde Soetes (ook bekend as soetwyn) te geniet. Dit sluit in Hanepoot, Muskadel, Edellaatoes, Rooi Jerepigo en Port. Verskeie kelders bedien ook sop om die wyn te komplimenteer.[6]
Verwysings wysig
- ↑ SAWIS 2016. SA Wine Industry Statistics. NR 40
- ↑ "argiefkopie". Geargiveer vanaf die oorspronklike op 19 November 2016. Besoek op 24 Oktober 2016.
- ↑ http://www.southafrica.net/za/en/articles/entry/article-southafrica.net-the-breedekloof-wine-route
- ↑ http://www.sa-venues.com/attractionswc/breedekloof-wine-route.htm
- ↑ http://www.capetownmagazine.com/events/breedekloof-soetes-and-soup-festival/11_37_55713
- ↑ "argiefkopie". Geargiveer vanaf die oorspronklike op 21 April 2017. Besoek op 24 Oktober 2016.