Die Bronxrivier (/brɒŋks/), ongeveer 39 km lank,[1] vloei deur suidoos New York-deelstaat in die Verenigde State en dreineer 'n gebied van 99 km2 (38,4 vk. myl). [1] Dit is vernoem na die koloniale setlaar Jonas Bronck. Naas die Hutchinsonrivier is die Bronxrivier die enigste varswaterrivier in New York Stad.[2]

Die Bronxrivier in Shoelace Park, in The Bronx.

Dit het oorspronklik ontstaan in wat nou die Kensico Reservoir is, in Westchester County noord van New York Stad. Met die bou van die Kensicodam in 1885 is die rivier egter van sy natuurlike bolope afgesny en vandag dien 'n klein sytakstroompie as sy bron. Die Bronxrivier vloei suid verby White Plains, dan suid-suidwes deur die noordelike voorstede in New York, en gaan deur Edgemont, Tuckahoe, Eastchester en Bronxville . Dit vorm die grens tussen die groot stede Yonkers en Mount Vernon, en vloei in die noordelike punt van The Bronx, waar dit Oos-Bronx van Wes-Bronx verdeel, suidwaarts deur Bronx Park, New York Botaniese Tuin en die Bronx-dieretuin en gaan voort deur woonbuurte van die Suid-Bronx. Dit mond uit in die East River, 'n getystraat wat met Long Island Sound verbind is, tussen die Soundview- en Hunts Point-woonbuurte.

Besoedeling wysig

 
Die ingang na die New York Botaniese Tuin.

Gedurende die 19de en 20ste eeue het die rivier 'n natuurlike riool geword waarin industriële afval elke dag gestort is. 'n Vroeë meule aan die geïndustrialiseerde rivier was die Lorillard Snuifmeul, wat op die terrein van die New York Botaniese Tuin bewaar is. Met die afname in vervaardiging in die gebied, het die rivier voortgegaan om waterbesoedeling te ondervind van die gemeenskappe wat langs sy oewers woon. In Desember 1948 is die vloei van die Bronxrivier verander om 'n kromme in sy loop in Bronxville uit te skakel, om grond in die ou rivierbedding te herwin waarop 'n toevoeging tot die Lawrence-hospitaal gebou kon word. Tydens die uitgrawings is 'n groot sandbank ontbloot waar sand oor honderde jare by die draai opgehoop het en 'n sandstrand gevorm het.[3]

In die 21ste eeu het omgewingsdrukgroepe, insluitend die Bronx River Alliance, voorgestel dat die rivier moet terugkeer na sy oorspronklike toestand as 'n skoon waterweg.[4] Kragtens 'n ooreenkoms van 28 November 2006 het die munisipaliteite van Scarsdale, White Plains, Mount Vernon en Greenburgh ingestem om teen 1 Mei 2007 die storting van riool in die Bronxrivier te staak.[5]

Verwysings wysig

  1. 1,0 1,1 Shaw, Richard K.; Reinhardt, Lindsay; Isleib, Jacob. "Soil Survey of Bronx River Watershed Bronx, New York" (PDF). www.nycswcd.net/. USDA. Geargiveer vanaf die oorspronklike (PDF) op 19 Maart 2012. Besoek op 13 Oktober 2014.
  2. Berger, Joseph (19 Julie 2010). "Reclaimed Jewel Whose Attraction Can Be Perilous". The New York Times. Besoek op 21 Julie 2010..
  3. Barbara Shay MacDonald (Scarsdale Historical Society), "The Bronx River: Boundary of Indian Tribes, Colonies, Manors, Cities and Villages" Geargiveer 7 Junie 2010 op Wayback Machine
  4. Bronx River Alliance.
  5. "Cuomo Announces 5 Major Water Pollution Settlements: Over $8 Million To Be Used For Water Protection". www.ag.ny.gov. New York Attorney General. Geargiveer vanaf die oorspronklike op 2 November 2014. Besoek op 14 Oktober 2014.