Corner House
Corner House (ook Old Corner House) in die sentrale sakekern van Johannesburg was die hoofkantoor van een van die grootste myngroepe in Suid-Afrika. Die besondere gebou met sy unieke geskiedenis is in 1999 tot gedenkwaardigheid verklaar.
Teenswoordig wysig
Toe die eiendomsontwikkelaar Urban Ocean hierdie eerstydse statusgebou by die adres Commissionerstraat 77, op die hoek met Simmondsstraat, in 2003 koop, was dit in 'n verwaarloosde toestand. Tans huisves dit 'n hotel, kantore, woonstelle, restaurante, 'n spa en 'n gimnasium.
Geskiedenis wysig
Die eerste gebou op hierdie plek het dateer uit 1886 en was van sinkplaat en hout. Toe was dit bekend as "Beit se gebou". In 1893 is 'n dubbelverdiepinggebou opgerig met luukse afwerkings soos balkonne, gietystertralies, 'n koepeldak van koper en groen dakpanne. Na bewering is die Jameson-inval hier beplan. Hermann Eckstein het in 1904 die dienste van die Suid-Afrikaanse argitekte Leck en Emley verkry en is Johannesburg se eerste wolkekrabber met 10 verdiepings gebou. Dit het 'n hyser en marmervloere gehad en die kantore is betimmer met eikehout en kiaathout. In die kelder was twee groot kluise vir die goudstawe. Koeëlgate in die voorgewel herinner aan die 1922-staking. Rand Mines het die gebou in 1964 aan Barclays Bank verkoop. Die myngroep bou toe daarnaby 'n nuwe hoofkantoor op die hoek van Commissionerstraat en Sauerstraat. Aanvanklik is na die nuwe gebou ook verwys as Corner House.
Argitektuur wysig
Die hele gebou en veral sy fasade word as van argitektoniese belang beskou.
Naam wysig
Die naam Corner House verwys na die ligging van die gebou, maar ook na die stiger van Rand Mines, naamlik Hermann Eckstein. Eckstein uit Duits vertaal beteken hoeksteen. Dalk het Eckstein homself as 'n hoeksteen in die mynbedryf beskou.
Bibliografie wysig
- Palmer, Eve en Geoffrey Jenkins: The companion guide to South Africa. Londen: Collins, 1978. ISBN 0-00-211189-6
- Standard Encyclopaedia of Southern Africa, deel 3. Kaapstad: Nasou, 1971.
- www.emporis.com