DEFA
Die Deutsche Film AG, kort DEFA, was die rolprentateljee van die Duitse Demokratiese Republiek. Die ateljee, wat deur die Oos-Duitse staat genasionaliseer is, het sy hoofkwartier in Potsdam-Babelsberg gehad en was sedert die 1950's ook 'n belangrike inhoudverskaffer vir die nuutgestigte DDR-televisieuitsaaidiens Deutscher Fernsehfunk (later Fernsehen der DDR).
Die DEFA het sowat 700 rolprente, 750 animasiefilms asook 2 250 dokumentêre en kortfilms vervaardig. Sowat 8 000 buitelandse rolprente is van Duitse klankbane voorsien.[1]
Oorhoofse doel wysig
Volgens sy stigters sou die DEFA die nuwe bewindhebbers in Oos-Duitsland se voorneme ondersteun "om die demokrasie in Duitsland te herstel, fascistiese houdings te verander en mense tot sosialistiese burgers op te voed." Die politieke suiweringsbeleid van denazifisering in die Sowjet-besettingsone van Duitsland en in die DDR was ook daarop gemik om die rolprentbedryf en die kulturele lewe van "reaksionêre elemente en die ondemokratiese anti-humanistiese nasionaal-sosialistiese ideologie en sy voorstanders te bevry".
Die hoofonderwerp van DEFA-rolprente was van die begin af een van die amptelike hoofbestaansredes van die DDR, soos voorgegee deur die Sosialistiese Eenheidsparty van Duitsland (SED) – anti-fascisme, saam met die ideale van sosialistiese realisme. Denkwyses en uitbeeldings van nihilisme, dekadensie, formalisme, burgerlike bekrompenheid en "burgerlike gedrag" moes deur professionele filmlui liewers vermy of gekritiseer en deur sosialistiese ideale vervang word.
So is veral rolprente vervaardig wat in die tradisie van die werkersklas gestaan het, asook anti-oorlogsrolprente wat die NS-ideologie sou ontmasker. Van DEFA-films is verwag dat hulle die sosialistiese, humanistiese en kommunistiese waardes asook die liefde vir die DDR sou weerspieël.
Verwysings wysig
Eksterne skakels wysig
- Media
Wikimedia Commons het meer media in die kategorie DEFA.
- DEFA-stigting en rolprentargief
- (de) (en) DEFA-Stiftung - About the Foundation