Doornfontein-sinagoge

Die Doornfontein-sinagoge of Leeue-sinagoge is die oudste sinagoge in Johannesburg wat nog as sodanig gebruik word.

Die Doornfontein-sinagoge in 1907, twee jaar nadat dit voltooi is.

Die mynmagnaat Carl Hanau, wat grootgeword het op Victoria-Wes, was in 1905 die sinagoge se eerste president.

Die sinagoge is geleë by Siemertweg 120, Nieu-Doornfontein, twee straatblokke vanaf Ellispark. Dis in 1905 opgerig teen ’n koste van £4 000 en die Leeue-sinagoge (Lions Shul) genoem na die twee leeus van gegote yster wat waghou aan weerskante van die ingang. Die argitek was Morrie Jacob Harris. ’n Brand het die gebou in 1930 in puin gelê. Dit is volledig gerestoureer, maar so is die gebou se oorspronklik voorkoms verander.

Links van die sinagoge was ’n saal wat die Joodse gemeente vir geleenthede gebruik het. Dit is later verkoop en omskep toe die gemeente se lidmate afgeneem het weens die verhuising van inwoners na aangenamer voorstede.

Bronne

• (en) Johannesburg 1912. URL besoek op 14 November 2017.