Eratostenes
Eratostenes van Sirene (Grieks: Ἐρατοσθένης ὁ Κυρηναῖος, Eratosthénēs ho Kurēnaĩos; omstreeks 276 v.C. tot 195/194 v.C.) was ’n Griekse wiskundige, geograaf, skrywer, digter, uitvinder en veel meer. Hy was ’n geleerde man wat die hoofbibliotekaris van die Biblioteek van Alexandrië was. Sy werk kan vergelyk word met wat nou geografie is; hy het terme daargestel wat vandag nog gebruik word.[1]
| Eratostenes | |
|---|---|
 | |
| Gebore | 276 v.C., Sirene |
| Oorlede | 194 v.C. (op sowat 82), Alexandrië |
| Beroep | Bibliotekaris, skrywer, digter, uitvinder |
| Bekend vir | Sif van Eratostenes Stigter van geografie |
Loopbaan wysig
Hy is die bekendste as die eerste persoon wat die omtrek van die aarde bereken het, wat hy gedoen het met behulp van die uitgebreide opnameresultate waartoe hy as bibliotekaris toegang gehad het; sy berekening was merkwaardig akkuraat.[2] Hy was ook die eerste mens wat die helling van die aarde se draaias bepaal het, en dit was ook merkwaardig akkuraat.[3]
Eratostenes was die stiger van wetenskaplike chronologie; hy het die datums van die hoofgebeure van die grootliks mitologiese Trojaanse Oorlog hersien en 1183 v.C. bepaal as die datum waarop Troje verwoes is. In getalteorie het hy die sif van Eratostenes geskep, ’n doeltreffende manier om priemgetalle te identifiseer.
Hy het op baie terreine groot invloed gehad. Volgens ’n inskrywing[4] in die Suda (’n 10de-eeuse ensiklopedie), noem sy kritici hom spottenderwys "Beta" (die tweede letter van die Griekse alfabet) omdat hy altyd tweede gekom het in alles wat hy aanpak.[5] Sy aanhangers het hom egter "Pentatlos" genoem, na die vyfkampatlete in die Olimpiese Spele wat uitstekende mededingers is, omdat hy bewys het hy het kennis op baie terreine.
Verwysings wysig
- ↑ Roller, Duane W. Eratosthenes' Geography. New Jersey: Princeton University Press, 2010.
- ↑ Russo, Lucio (2004). The Forgotten Revolution. Berlyn: Springer. p. 273–277.
- ↑ "Eratosthenes (276–195 B.C.)" Geargiveer 24 Februarie 2021 op Wayback Machine. Cornell-universiteit. Besoek op 28 Julie 2019.
- ↑ "Entry ε 2898"
- ↑ Sien ook Asimov, Isaac. Asimov's Biographical Encyclopedia of Science and Technology, nuwe hersiene weergawe. 1975. Inskrywing #42, "Eratosthenes", bl. 29. Pan Books Ltd, Londen. ISBN 0-330-24323-3.
Skakels wysig
Wikimedia Commons het meer media in die kategorie Eratostenes.
Hierdie artikel is in sy geheel of gedeeltelik uit die Engelse Wikipedia vertaal.
