Erik Laubscher
Frederik Bester Howard (Erik) Laubscher (1927 – 22 Mei 2013) was ’n Suid-Afrikaanse skilder. Hy is in Tulbagh in die Wes-Kaap gebore. Nadat hy in 1945 aan Queen’s College op Queenstown gematrikuleer het, het hy ’n jaar lank kunsonderrig van Maurice van Essche in Kaapstad ontvang. In 1947 is hy na Londen, waar hy onder Frank Slater aan die Slade-kunsskool in die portretkuns gestudeer het. Van 1949 tot 1951 het hy aan verskeie kunsinrigtings en onder verskeie leermeesters in die skilderkuns studeer.
| Erik Laubscher | |
|---|---|
| Gebore | 1927 Tulbagh, Kaapprovinsie, Unie van Suid-Afrika |
| Sterf | 22 Mei 2013 (op 86) Houtbaai, Kaapstad, Wes-Kaap, Suid-Afrika |
| Nasionaliteit | .svg){kind=small} Suid-Afrika |
| Veld | Skilderkuns |
| Opleiding | Queen’s College, Slade-kunsskool |
| Beïnvloed deur | Maurice van Essche |
Laubscher het eers aan die Anglo-Franse kunssentrum studeer, en daarna aan die Montmartre-Akademie in Parys onder Fernand Leger. Hy het aan verskeie uitstallings in die buiteland deelgeneem, maar het in dié tyd vir ’n paar maande na Suid-Afrika teruggekeer om sy eerste eenmanuitstalling in Kaapstad aan te bied.
In 1953 het hy na Suid-Afrika teruggekeer om die pos van hoof van die Continental School of Arts in Kaapstad te aanvaar. (Die skool se naam het in dieselfde jaar na die Contemporary School of Art verander.) Hy het dié pos net tot 1955 beklee, waarna hy aktief by die aktiwiteite van verskeie kunsinstellings en -liggame betrokke was. Gedurende die tydperk van 1955 tot 1969 het Laubscher as onder meer ’n kleurkonsultant en verkoopman by ’n verfmaatskappy gewerk, en het hoofsaaklik in sy vrye tyd geskilder. In 1969 is hy as kunsdirekteur van die Kaapstadse Kunssentrum aangestel en in 1970 het hy die Ruth Prowse-kunssentrum in Woodstock, Kaapstad, gestig waar hy ook as hoof gedien het.
Erik Laubscher was ook voorsitter of ondervoorsitter van verskeie kunsverenigings, hy was medestigter (saam met Marjorie Wallace) van die jaarlikse Cape Salon en was die eerste Suid-Afrikaanse kunstenaar wat die Carnegie-beurs vir verdere studie in die VSA ontvang het (1966). Sedert 1973 was hy ook kunsresensent van die tydskrif To The Point.
Laubscher het eenmanuitstallings in Kaapstad, Stellenbosch, Pretoria, Johannesburg en Genève gehou, en het aan etlike nasionale en internasionale groepuitstallings deelgeneem. Hy is bekend vir sy uitbeeldings van die Kaapse landskap. Van sy openbare opdragte is ’n muurpaneel – wat selle en chromosome simboliseer – vir die mediese fakulteit van die Universiteit van Stellenbosch; 4 mosaïekmuurpanele vir die Tygerberg Hospitaal in Parow en muurskilderinge vir die destydse Jan Smutslughawe en die Knysna-winkelsentrum. Sy werk word verteenwoordig in onder meer die Suid-Afrikaanse Nasionale Galery, die Hester Rupert-museum op Graaff-Reinet en die Pretoriase Kunsmuseum.
Laubscher was 86 toe hy op 22 Mei 2013 in Houtbaai oorlede is.
Bronnelys wysig
- Gray, Stepehn: Erik Laubscher and Landscape. In: Lantern. Tydskrif vir Kennis en Kultuur. Jaargang 19, nr. 3, Maart 1970
- Wêreldspektrum, Vol. 16, 202-203, ISBN 0 908409 57 5