Farnborough

Wikimedia dubbelsinnigheidsblad

Farnborough is 'n dorp in die noorde van die Engelse graafskap Hampshire, sowat 55 km (35 myl) suidwes van Londen geleë. Alhoewel die stad in die Doomsday Book (1086) genoem is, het dit tot die laat negentiende eeu 'n klein dorpie gebly. Gedurende die twintigste eeu het dit ontwikkel tot die sentrum van Britse lugvaartnavorsing en 'n slaapstad vir Londen. Elke tweede jaar vind die Farnborough Lugskou hier plaas. Die munisipaliteit (borough) Rushmoor bestaan uit Farnborough en sy naburige dorp Aldershot.

Farnborough
Koördinate: 51°16′30″N 0°50′40″W / 51.27500°N 0.84444°W / 51.27500; -0.84444
LandVlag van Verenigde Koninkryk Verenigde Koninkryk
LandVlag van Engeland Engeland
Graafskap Hampshire
GemeenteRushmoor
Oppervlak
 • Totaal19,8 km2 (7,6 vk. myl)
Bevolking
 • Totaal57 916
 • Digtheid2 955/km2 (7 650/vk. myl)
TydsoneUTC+00:00 (MGT)
 • SomertydUTC+01:00 (BST)
Skakelkodes01252


Geografie wysig

Farnborough lê op die hoofspoorlyn tussen Londen en Southampton ongeveer 50 km vanaf Waterloo-stasie. Die M3 snelweg loop deur die noordelike gedeelte van Farnbourgh. Die hoofspoorlyn Londen-Southampton loop parallel met en ongeveer een kilometer suid van die M3. Die Blackwater-rivier vorm beide die oostelike grens van die stad en die Hampshire-Surrey-grens. Die Reading-Guildford-spoorlyn en die Blackwater Valley Road (A331) volg die loop van die rivier. Farnborough se suidelikke grens is die Basingstoke-kanaal.

Die grootste gedeelte van Farnborough is beboud met 'n groot vliegveld aan die westekant. Oorspronklik was die meeste van die huidige stad 'n kombinasie van bos en heide. Daar is feitlik geen landbougrond nie, hoewel die dorp 'n gholfbaan en 'n bosveld besit. Die oostelike grens word deur die Blackwaterrivier gedefiniëer. Hierdie rivier definiëer ook die Hampshire-Surrey-grens. Die stad het 'n oppervlak van 19.8 km2[1] en 'n bevolking van 57 916.[2]

Farnborough het 'n gematigde kusklimaat met 'n gemiddelde maksimum van 23 °C gedurende Julie en 'n gemiddelde minimum van 1 °C gedurende Februarie. Die gemiddelde jaarlikse reënval is ongeveer 700 mm.[3][4]

Geskiedenis wysig

Farnborough is opgeneem in die Doomsday Book (1086) waar die stad se naam as "Ferneberga" geskryf is. Die naam kom van die Angelsaksiese woord vir "varing heuwel" ("fern hill"). Die Sint-Pieterskerk dateer uit 1190, maar vir baaie eeue daarvoor beset 'n Anglo-Saksiese struktuur die werf.[5] Tussen 1787 en 1794 is die 60 km Basingstokekanaal tussen die Weyrivier en Basingstoke gebou.[6] Die kanaal het nooit 'n wins gemaak nie maar dit was vir die bou van die spoorlyn tussen Woking en Basingstoke nuttig, maar nadat die spoorlyn voltooi is, neem die spoorlyn die meeste van die kanaalsbesigheid. Met die bou van die kanaal is die grens tussen Farnborough an Aldershot vasgelê. Die spoorlyn deur Farnborough is in 1838 voltooi.[7] Nogtans, volgens die 1851 volkstelling het Farnborough 'n bevolking van 700. In 1855 begin die Britse regering 'n militêre basis in Aldershot en Farnborough te bou. Die kaserne ten noorde van die Basingstoke-kanaal is bekend as "North Camp" en dié ten suide van die kanaal as "South Camp".[8]

 
St. Michael's Abbey, begraafplek van Napoleon III.

In 1849 is die nuwe spoorlyn tussen Reading en Guildford geopen. Die huidige Farnborough North stasie dateer van die opening van die spoorlyn. In 1858 is nog 'n stasie geopen met die naam "North Camp" om die militêre kamp te dien. Die aankoms van die militêre kampe het tot 'n oplewing aan die suidelike punt van die stad vlakby North Camp gelei. Teen 1911 styg die bevolking tot 10 000.[8]

In 1870 is die Tweede Franse Keiserryk omvergewerp en dir keiser Napoleon III vlug na Chislehurst Engeland met sy vrou Eugenie en seun Louis-Napoleon. Napoleon sterf in 1873 en in 1879 sneuvel Louis-Napoleon in die Anglo-Zoeloeoorlog. In 1885 verhuis Eugenie na Farnborough en neem sy intrek by Villa Cymos. Daar herbou sy die huis en bou ook die St Michaels Abbey as 'n mausoleum vir haar man en seun.[9] Eugenie sterf in 1920 en in 1927 is sy huis aan die Farnborough Hill Convent School, 'n Rooms Katolieke privaat skool verkoop. Die skool het die gebou uitgebrei en bestaan vandag uit ongeveer 550 meisies.

Lugvaartbedryf wysig

In 1905 het die Royal Engineers, wat by Aldershot gesetel was, hul waarnemingsballonfabriek na Farnborough verskuif en in 1908 het Samuel Cody, 'n Amerikaanse lugvaartliefhebber, 'n vliegtuig ontwikkel wat ook vir militêre waarneming gebruik kon word. Hy het sy ontwikkeling by Farnborough getoets en gedemonstreer. Cody is in 1912 in 'n vliegongeluk dood, maar die vervaardiging van ballonne het voortgeduur. Met die uitbreek van die Eerste Wêreldoorlog in 1914 word die ballonfabriek ook 'n sentrum vir lugvaartnavorsing. Terselfdertyd is die Farnborough-vliegveld ontwikkel.

Met die klemverandering is die ballonfabriek die Royal Aircraft Establishment herdoop en onder Britse regering se beheer gebly totdat dit in 2001 geprivatiseer is. Een van die navorsingsinstrumente wat by Farnborough ontwikkel is, is 'n reeks windtonnels waar vliegtuigkarakteristieke getoets word. Die grootste, gehuisves in 'n gebou van 24 meter by 60 meter, word aangedryf deur 'n waaier met 'n deursnit van 7,2 meter.

In 1948 het Farnborough die eerste lugskou aangebied - 'n wêreldwye mark vir lugvaarttoerusting. Dit word steeds in die ewe genommerde jaar gehou, terwyl Parys in die onewe jare 'n soortgelyke lugskou aanbied. Baie nuwe vliegtuie word eers op die skou aangekondig en vliegaktiwiteite bevat gewoonlik 'n vertoning deur die Red Arrows. Tussen 1970 en 2000 het Concorde altyd 'n verbygang gemaak.

Die meeste groter lande het fasiliteite om lugvaartongelukke te ondersoek, terwyl kleiner of armer lande reëlings tref dat die ongelukke op hul gebied deur 'n onderneming van 'n groter lande ondersoek word. Die Britse Aircraft Accident Investgation Branch (AAIB) is eers in 1915 as 'n militêre eenheid ogestig is, maar deesdae is dit onder die leiding van die Britse departement van vervoer. Die AAIB is in 'n afgesonderde deel van die Farnborough-vliegveld geleë en het 'n wêreldwye reputasie vir sy werk.

Lugvaartbedryf te Farnborough
 
'n Britse Concorde by die Farnborough-lugskou.
'n Britse Concorde by die Farnborough-lugskou.  
 
Glouster-Whittle se eerste vlug: die eerste vlug van 'n Geallieerde straalvliegtuig tydens die Tweede Wêreldoorlog.
Glouster-Whittle se eerste vlug: die eerste vlug van 'n Geallieerde straalvliegtuig tydens die Tweede Wêreldoorlog.  
 
Replika van die vliegtuig van kol. Cody by die FAST Museum
Replika van die vliegtuig van kol. Cody by die FAST Museum  
 
Tydelike ballonskure, nou 'n monument langs die vliegveld
Tydelike ballonskure, nou 'n monument langs die vliegveld  
 
Die AAIB het ondersoek na die bomaanval op Pan Am vlug 103 (Lockerbie-ramp) ingestel
Die AAIB het ondersoek na die bomaanval op Pan Am vlug 103 (Lockerbie-ramp) ingestel  

Politiek wysig

Voordat Farnborough en Aldershot saamgesmelt is, het Farnborough sy eie stadsraad en buregmeester gehad. Deesdae is Farnborough is 'n deel van die municipaliteit (borough) Rushmoor. Die munisiplaiteit het dertien kiesafdelings, waarvan agt in Farnborough is.[10]

Verwysings wysig

  1. "Farnborough" (in Engels). City Population. 30 Junie 2018. Besoek op 31 Julie 2020.
  2. "Population data sheet" (in Engels). Rushmoor Borough Council. Junie 2020. Geargiveer vanaf die oorspronklike op 31 Julie 2020. Besoek op 31 Julie 2020.
  3. "Farnborough Climate 1981–2010" (in Engels). Junie 2011. Geargiveer vanaf die oorspronklike op 13 November 2017. Besoek op 22 Januarie 2020.
  4. (en) William Page, red. (1911). A History of the County of Hampshire: Volume 4. London: Victoria County History. Parishes: Crondall. Besoek op 26 Januarie 2020.
  5. "The History Of St Peter's Church" (in Engels). St Peter's Parish Church Council, Farnborough. Geargiveer vanaf die oorspronklike op 31 Julie 2020. Besoek op 6 Augustus 2020.
  6. Jebens, Dieter (2015). A Guide to the Basingstoke Canal (in Engels). The Basingstoke Canal Society.
  7. Roe, Ted (1972). Mainly about Old Fleet and Crookham (in Engels). Ted Roe.
  8. 8,0 8,1 William Page, red. (1911). "Parishes: Farnborough". Victoria County History - A History of the County of Hampshire (in Engels). London: British History Online. p. 15-18. Besoek op 6 Augustus 2020.
  9. Mansel, Philip (2013). Kelly, Debra; Cornick, Martyn (reds.). "A history of the French in London - liberty, equality, opportunity" (PDF) (in Engels). University of London, School of Advanced Study, Institute of Historical Research. p. 118. ISBN 978 1 909646 48 3. Geargiveer (PDF) vanaf die oorspronklike op 21 Julie 2018.
  10. "Ward facts and figures" (in Engels). Rushmoor Borough Council. Besoek op 4 Maart 2021.

Eksterne skakels wysig