Die Graslei is 'n straat in die historiese stadsentrum van die stad Gent in Vlaandere. Die Graslei vorm die kaai op die regteroewer van die Leie, terwyl die linkeroewer deur die Korenlei in beslag geneem word. Albei kaaie strek vanaf die Grasbrug tot by die Sint-Michielsbrug.

Sonsondergang aan die Graslei (regs), Gent

Teen die 11de eeu het die handel langs hierdie kaaie tot so 'n mate toegeneem, dat hulle die belangrikste hawe in die stad geword het. As gevolg van die sogenaamde graanstapelrecht, het Gent die alleenreg tot alle invoer van graan in die Graafskap Vlaandere besit. Hierdeur het die Gras- en Korenlei asook die Korenmarkt die middelpunt van graanhandel in Vlaandere geword.

Die huidige geboue aan die Graslei is oorblyfsels uit hierdie roemryke tydperk. Hulle sluit onder meer die 13e eeuse Korenstapelhuis in, waarvan die gewel as die oudste trapgewel ter wêreld beskou word.

Die Graslei met die drie torens op regterhand