Groote Schuur-hospitaal

Groote Schuur-hospitaal
hospitaal, teaching hospital
Datum van stigting of ontstaan1938Wysig
Vernoem naGroote SchuurWysig
AffiliationUniversiteit van KaapstadWysig
LandSuid-AfrikaWysig
Geleë in administratiewe eenheidKaapstadWysig
Geografiese ligging33°56′29″S 18°27′46″EWysig
Ouer organisasieWestern Cape Department of HealthWysig
Telefoon nommer+27-21-404-9111Wysig
Amptelike webwerfhttp://capegateway.gov.za/gshWysig
Map

Die Groote Schuur-hospitaal (afkorting: "GSH", die hospitaal staan in die omgangstaal ook as "Grooties" bekend) is 'n groot staatsbeheerde akademiese hospitaal wat teen die hange van Duiwelspiek in Kaapstad (provinsie Wes-Kaap, Suid-Afrika) geleë is. Die hospitaal is op 31 Januarie 1938 amptelik geopen en het veral danksy die baanbrekende werk van prof. Chris Barnard en sy span, wat hier in 1967 die eerste menslike hartoorplantingsoperasie uitgevoer het, wêreldberoemd geword.

Die ou hoofgebou van die Groote Schuur-hospitaal, 2007.
Voorkant van die hospitaal, 2012.
Aanwysing van die plek waar die eerste hartoorplanting gedoen is.

Groote Schuur is die akademiese hospitaal van die Mediese Skool van die Universiteit van Kaapstad wat tersiêre pasiëntesorg en akademiese opleiding in alle belangrike gesondheidsdissiplines aanbied. Die hospitaal is in 1984 aansienlik uitgebrei en van twee nuwe vleuels voorsien. Die ou hoofgebou huisves tans verskeie akademiese kliniese departemente asook 'n museum wat die eerste hartoporplantingsoperasie behandel wat op die pasiënt Louis Washkansky uitgevoer is.

Die hospitaal beskik oor 867 beddens. In November 2007 was meer as 500 dokters, 1 300 verpleegsters en 250 mediese spesialiste aan die Groote Schuur-hospitaal verbonde.[1]

Geskiedenis wysig

Die Groote Schuur-hospitaal het sy ongewone naam aan 'n pakhuis van die Nederlandse Oos-Indiese Kompanjie te danke wat in 1657 op die perseel van die huidige hospitaal opgerig is. Die naam van die landgoed in die huidige voorstad Rondebosch, waar die skuur gebou is, is in 1812 verander na De Groote Schuur.[2]

In 1891 het Cecil John Rhodes die landgoed gekoop. Rhodes het sy woning met al sy meubels en dele van sy grond later aan die Suid-Afrikaanse regering bemaak om as woning vir toekomstige eerste ministers te dien. Die res van die landgoed is aan die owerhede nagelaat "vir die gemeenskap".[3]

Die oorspronklike Groote Schuur-hospitaal is op 31 Januarie 1938 amptelik ingewy deur die eerste goewerneur-generaal van die Unie van Suid-Afrika, sir Patric Duncan. Die heel eerste pasiënt van Groote Schuur was die 13-jarige William Keene, wat nog op die openingsdag met 'n gebreekte been en beseerde hand opgeneem is nadat sy fiets deur 'n motor omgery is.[4]

In 1971 is die vierde hart-longoorplanting in die wêreld by Groote Schuur gedoen.[5]

Verwysings wysig

  1. "Groote Schuur-hospitaal: Algemene oorsig". Geargiveer vanaf die oorspronklike op 4 Desember 2008. Besoek op 30 Junie 2008.
  2. Pillans, Adrie: Groote Schuur word 50. In: Suid-Afrikaanse Panorama, volume 33, nommer 8 (Augustus 1988), bl. 43
  3. Pillans (1988), bl. 45
  4. Pillans (1988), bl. 43
  5. Keyter, Elise: Lofwaardige mediese prestasies. In: Suid-Afrikaanse Panorama, volume 33, nommer 7 (Julie 1988), bl. 16

Eksterne skakels wysig

Koördinate: 33°56′27″S 18°27′46″O / 33.94083°S 18.46278°O / -33.94083; 18.46278