Jaco Reinach
Jaco Reinach (Ceres, 1 Januarie 1962 – Kroonstad, 21 Januarie 1997) was 'n Springbok-rugbyspeler en -atleet.
| |||||
| Volle naam | Jacobus Reinach | ||||
|---|---|---|---|---|---|
| Geboortedatum | 1 Januarie 1962 | ||||
| Geboorteplek | Ceres, Suid-Afrika | ||||
| Sterftedatum | 21 Januarie 1997 (op 35) | ||||
| Sterfteplek | Kroonstad | ||||
| Lengte | 1.78 m | ||||
| Massa | 78 kg | ||||
| Skool | Grey-kollege | ||||
| Kinders | Cobus Reinach | ||||
| Rugbyloopbaan | |||||
| Loopbaan as speler | |||||
| Posisie(s) | Vleuel | ||||
| Springbokno. | 542 | ||||
| Amateurspanne | |||||
| Jare | Klub / span | Weds | (pte) | ||
| Oud-Greys | |||||
| Provinsiale- / Staatspanne | |||||
| Jare | Klub / span | Weds | (pte) | ||
| Vrystaat | |||||
| Nasionale span(ne) | |||||
| Jare | Land | Weds | (pte) | ||
| 1986 | .svg){kind=small} Suid-Afrika
|
4 | (8) | ||
Reinach is die laaste persoon wat Springbokkleure in atletiek én rugby kon verwerf, omdat die Springbokkleure daarna tot rugby beperk is. Hy was ten tyde van sy dood ná veertien jaar steeds die SA rekordhouer in die 400 m met ’n tyd van 45,01 sekondes,[1] wat hy op 15 April 1983 in Bloemfontein opgestel het[2] en het in vier rugbytoetse twee drieë gedruk. Vir die Springbokke het hy in 1986 op vleuel uitgedraf.[3] Reinach se rekord is eers in April 2011 oortref deur die 400 m-hekkiesatleet LJ van Zyl, die voormalige Bloemfonteinse skole-atleet. Hy het die Suid-Afrikaanse senior rekordhouer in die 400 m-hekkies geword op die Geelbladsye- Tussenprovinsiale Atletiekbyeenkoms in Germiston toe hy, ook 'n oudleerling van Grey-kollege, die 400 m in 44,86 s. wen en die vinnigste oud-Grey-leerling in dié nommer in die roemryke atletiekgeskiedenis van die skool geword het. Reinach het bykans 28 jaar (April 1983) vantevore die Suid-Afrikaanse rekord in die 400 m op die Suid-Afrikaanse senior kampioenskap voor sy tuisskare in Bloemfontein opgestel.[4]
Reinach het sy Springboktoetsdebuut op 10 Mei 1986 gemaak teen die Nieu-Seelandse Kavaliers op Nuweland in die eerste toetswedstryd waarin die Bokke aangevoer is deur Naas Botha.[5] Die ander nuwelinge in die Springbokspan daardie dag was Uli Schmidt, Gert Smal, Christo Ferreira, Jannie Breedt en Wahl Bartmann. Op 31 Mei daardie jaar speel hy in sy vierde en laaste toets, ook teen die Nieu-Seelanders.[6]
Reinach is op Dinsdag 21 Januarie 1997, 20 dae ná sy 35ste verjaardag, dood toe sy motor buite Kroonstad van die pad geloop en omgeslaan het. Luidens ’n berig wat die volgende dag in Beeld verskyn het, het die ongeluk ná 14:00 gebeur toe Reinach deur ’n plas water in die pad tussen Kroonstad en Ventersburg gery het. Die motor het vermoedelik van die pad gegly, gerol en teen ’n boom gebots. Reinach is op slag dood. Hy was na Johannesburg onderweg om sake te doen. Hy het ’n onderneming in Bloemfontein, sy tuisstad, gehad wat papier aan groothandelaars verskaf het.
Toe die ongeluk gebeur, het Reinach se vrou, Annette, hul derde seuntjie verwag. Hy is die volgende maand gebore. Sy ander twee seuns, Herman en Cobus, was destyds onderskeidelik nege en ses jaar oud. Cobus het in sy pa en oupa se spore gevolg en ook Grey-kollege se eerste vyftiental gehaal. Hy is ook oorleef deur sy ouers, dr. Herman en Petro Reinach, twee broers, Norman en Herman, en twee susters, Ronel en Monica. Cobus, wat op 7 Februarie 1990 gebore is, het in 2011 Durban toe verhuis waar hy in die koshuis van die Hoërskool Glenwood gaan woon en as rugbyafrigter vir die skool gewerk het. Hy is ’n skrumskakel vir die Haaie in die Curriebeker-, Vodacombeker- en Superrugbyreekse.
Bronne wysig
Verwysings wysig
- ↑ De Swardt, Wilhelm (21 Julie 2011). "24 uur". Volksblad. Besoek op 20 Maart 2013.
- ↑ Webtuiste van die Internasionale Vereniging van Atletiekfederasies Geargiveer 17 Mei 2020 op Wayback Machine.
- ↑ "Jan wil nou ’n dubbele Bok word"[dooie skakel], Beeld, 14 November 2007.
- ↑ "Beneke se wen dui op blink toekoms", Volksblad, 7 April 2011.
- ↑ "Nuwes sal deel doen, sê Moss"[dooie skakel], Die Burger, 12 Mei 1986.
- ↑ Espnscrum.com Spelerprofiel: Jaco Reinach.
Eksterne skakels wysig
- Cronjé, Hendrik (23 Oktober 2012). "Reinach aardjie na sy vaartjie". Volksblad. Geargiveer vanaf die oorspronklike op 28 Desember 2012. Besoek op 20 Maart 2013.
- "Reinach behaal ses drieë teen die SWD"[dooie skakel], Die Burger, 16 April 1986.
- Jaco Reinach by SARugby.co.za
- Jaco Reinach by www.genslin.us/bokke