KCRW is 'n radiostasie en lid van die National Public Radio-netwerk (NPR) wat sy programme op 89,9 MHz FM vanuit die kampus van Santa Monica-kollege in Santa Monica, Kalifornië uitsaai.[1] Naas programme, wat van die openbare en nie-kommersiële radionetwerk NPR oorgeneem word, saai KCRW sy eie nuus- en musiekprogramme vir die Groter Los Angeles-gebied, Suid-Kalifornië en op die internet uit. Die stasie se hoofradiosender is in Los Angeles se Laurel Canyon-distrik geleë en saai in die HD Radio-formaat (op 89.9 HD-2) uit.[2]

KCRW is een van twee radiostasies met volle NPR-lidmaatskap in die Groter Los Angeles-gebied - naas KPCC in Pasadena. KCRW het 'n oorsese dogterstasie, KCRW Berlin, wat sy programme sedert Oktober 2017 in Berlyn, die Duitse susterstad van Los Angeles, op 104,1 MHz FM uitsaai.[3] KCRW Berlin het die radiofrekwensie en uitsaailisensie oorgeneem wat NPR sedert April 2006 gebruik, maar in 2017 om finansiële redes teruggegee het. Vanuit sy ateljee in die Berlynse stadsdeel Schöneberg saai KCRW Berlin onder meer programme uit wat deur NPR worldwide vervaardig word, naas plaaslike inhoud.

Geskiedenis en roepletters wysig

KCRW is in 1945 gestig om soldate, wat uit die Tweede Wêreldoorlog teruggekeer het, in die nuwe FM-uitsaaitegnologie op te lei - vandaar die stasie se roepletters KCRW, 'n afkorting vir College Radio Workshop. Die K dui Amerikaanse radiostasies wes van die Mississippirivier aan (oos daarvan begin hul roepletters met 'n «W» - met enkele uitsonderings).

Verwysings wysig

  1. Santa Monica College Foundation: KCRW. Besoek op 18 Junie 2017
  2. "HD Radio-gids vir Los Angeles". Geargiveer vanaf die oorspronklike op 28 Januarie 2017. Besoek op 18 Junie 2017.
  3. KCRW Berlin- About KCRW Berlin 104.1 FM. Besoek op 13 Augustus 2019