Kakieverkiesing

'n Kakieverkiesing is 'n algemene verkiesing waarin die uitslag baie beïnvloed is deur heersende oorlogsomstandighede of deur 'n oorlog waarin die land kort tevore betrokke was.

Dit is vir opposisiepartye baie moeilik om 'n regerende party tydens 'n verkiesing in oorlogstyd te ontsetel. Om 'n sittende regering tydens 'n verkiesingsveldtog in oorlogstyd te bekritiseer is moeilik omdat die uitdagers maklik beskuldig kan word van 'n gebrek aan patriotisme onder die moeilike omstandighede. Die soldate stem boonop ook oor die algemeen vir die sittende regering omdat hulle geïndoktrineer is in die regverdigheid van die oorlog. By die kiesers bestaan ook die vrees vir die gevolge van 'n regeringsverandering tydens krisistye.

Die eerste kakieverkiesing in Groot-Brittanje was in Oktober 1900, in die middel van die Tweede Vryheidsoorlog. Hierdie was die eerste groot oorlog waarin die Britse leër kakiekleurige uniforms gebruik het as plaasvervanger vir die bekende rooi uniforms. Ook die Britse verkiesings van 1918, 1945 en 1983 was kakieverkiesings.

In Suid-Afrika was dit die geval met die verkiesings van 20 Oktober 1915 en 7 Julie 1943. Die verkiesings tydens die Suid-Afrikaanse Grensoorlog van 1966 tot 1989 kan as kakieverkiesings beskryf word, omdat die vrees by die publiek vir die kommunistiese gevaar deur politici uitgebuit is.