Wikipedia

Kapsuulhotel

'n Kapsuulhotel (カプセルホテル kapuseru hoteru), ook bekend as 'n podhotel, is 'n tipe hotel wat in Japan ontwikkel is, en wat bestaan uit 'n groot aantal baie klein "kamers" (kapsules). Die hotel maak voorsiening vir goedkoop, basiese oornaghuisvesting vir gaste wat nie die dienste aangebied deur die meer konvensionele hotelle benodig nie.

'n Ry kapsules in Osaka
Die boks linksbo is die TV, wat beheer word via die paneel linksagter. Hierdie paneel beheer ook 'n lig en die lugversorging. Op die regtermuur is 'n spieël en die lugversorging se inlaat in die boonste hoek.

Beskrywing wysig

Die kamer is 'n modulêre plastiek- of veselglasblok, ongeveer 2 by 1 by 1,25 meter groot. Fasiliteite verskil, maar die meeste sluit 'n televisie, elektroniese konsole en draadlose internetverbinding in. Die kapsules is sy-aan-sy gestapel, twee eenhede hoog, met trappies vir toegang na die tweedevlakkamers, wat lei tot vergelykings met lykslaaie in 'n lykshuis.[1] Die oopkant van die kapsule kan gesluit word vir privaatheid, met 'n gordyn of 'n veselglasdeur. Bagasie word in 'n sluitkas ("locker") gestoor; en die badkamers is gemeenskaplik. Gaste word versoek om nie te rook of eet in die kapsules nie.[2]

Sommige hotelle bied ook restaurante (of ten minste smousmasjiene), swembaddens en ander fasiliteite vir vermaak aan.[3] Kapsuulhotelle wissel in grootte, van vyftig kapsules tot 700, en hulle word hoofsaaklik deur mans gebruik.[4] 'n Paar kapsuulhotelle bied afsonderlike afdelings vir manlike en vroulike gaste. Klere en skoene kan soms geruil word vir 'n yukata en pantoffels nadat ingeboek is, en 'n handdoek mag ook verskaf word.

Voordeel wysig

Die voordeel van hierdie hotelle is gerief teen 'n baie lae prys, gewoonlik rondom ¥2000-4000 (VS$ 17-33) per nag. Hulle bied 'n alternatief vir diegene wat (veral op weeksaande) dalk te dronk is om veilig huis toe te gaan, of te skaam is vir hul gades.[5] Met die voortgesette resessie in Japan, sedert vroeg-2010, is meer en meer gaste – ongeveer 30% by die Kapsuulhotel Shinjuku 510 in Tokio – werkloos of onderbenut, wie haweloos sou wees tydens die krisis, en hulle het tydelik kapsules gehuur op 'n maand-tot-maand basis.[6]

Elders as in Japan wysig

Hierdie hotelstyl is egter nie gewild buite Japan nie, hoewel Westerse variante bekend as "pod"hotelle[7] ontwikkel is, met groter spasie vir akkommodasie en dikwels ook privaatbaddens.

Verwysings wysig

  1. ↑ [1]
  2. ↑ Solomon, Leonard (1997).
  3. ↑ Schreiber, Mark, "Back to the future of a 'hotel for 2001'", The Japan Times, 16 Januarie 2011, pp. 7–8.
  4. ↑ http://www.japan-guide.com/e/e2025.html#capsule.
  5. ↑ Wardell, Steven (Oktober 1994), "Capsule cure".
  6. ↑ Tabuchi, Hiroko.
  7. ↑ http://www.fodors.com/news/story-2357.html.
Hierdie artikel is in sy geheel of gedeeltelik vanuit die Engelse Wikipedia vertaal.
Ontsluit van "https://af.wikipedia.org/w/index.php?title=Kapsuulhotel&oldid=1592426"