King's African Rifles

Die King's African Rifles (KAR) was ’n Britse koloniale regiment wat bestaan het uit soldate van die gebiede om die hedendaagse Groot Mere van Afrika, van 1902 tot die streke se onafhanklikwording in die 1960's. Dit was beide militêr en intern as sekuriteitsmagte aktief in die koloniale gebiede en het later buite dié gebiede in die Wêreldoorloë diens gedoen. Die soldate was plaaslike inwoners, terwyl die meeste van die offisiere van die Britse weermag was.

’n Monument in Zomba vir Malawiese soldate van die KAR wat in die Eerste Wêreldoorlog gesterf het.

Geskiedenis wysig

 
Soldate van die 11de Oos-Afrikaanse Divisie op pad na Kalewa, Birma.
 
KAR-soldate vervoer voorraad per perd tydens die Mau Mau-opstand.

Die King's African Rifles het in die vroeë 1900's deelgeneem aan die veldtogte teen Mohammed Abdullah Hassan in Somalië. Dit was ook deel van die Britse lug- en grondmag wat Hassan in 1920 verslaan het.

Die KAR het aan die begin van die Eerste Wêreldoorlog bestaan uit 21 klein kompanjies in drie bataljonne oor die hele Brits-Oos-Afrika. Daar was in 1914 altesaam 70 Britse offisiere en 2 325 soldate. In 1917 is die KAR in ’n groot mate uitgebrei en van die bataljonne se getalle is verdubbel. Laat in 1918 het die KAR uit 22 bataljonne bestaan.

Die regiment het in WO1 onder andere teen die Duitse bevelvoerder Paul Erich von Lettow-Vorbeck en sy magte in Duits-Oos-Afrika geveg. Teen die einde van die oorlog was daar 1 193 Britse offisiere en 30 658 Afrika-soldate. Altesaam 5 117 soldate is gedood en gewond en nog 3 039 het aan siektes gesterf.

In die Tweede Wêreldoorlog het die KAR in verskeie veldtogte geveg – onder andere teen die Italianers in Italiaans-Oos-Afrika, teen die Franse in Madagaskar en teen die Japannese in Birma. Ná WO2 het die regiment ’n groot rol gespeel teen die oproermakers in die Mau Mau-opstand in Kenia. Die 1ste, 2de en 3de Bataljon het ook in die Maleise noodtoestand diens gedoen waar hulle baie betrokke was by gevegte teen kommunistiese rebelle.

In 1957 is die regiment hernoem tot die Oos-Afrikaanse Landmagte. Hul laaste hoof was koningin Elizabeth II. Toe die onderskeie streke waaruit die KAR-soldate gekom het onafhanklik raak, het die regiment begin disintegreer.

Die mate waarin die KAR se tradisies die moderne leërs van die voormalige Oos-Afrikaanse kolonies beïnvloed, verskil van land tot land. In Tanzanië was daar ’n opstand in 1964, waarna besluit is om weg te beweeg van die Britse militêre model. In Kenia, aan die ander kant, bestaan die naam Kenya Rifles steeds en die veldtogte waarop die KAR presteer het, word steeds gevier. Ook die Malawi Rifles bestaan steeds.

Bronne wysig

  • Mollo, Andrew; McGregor, Malcolm; Turner, Pierre (1981). The armed forces of World War II: uniforms, insignia, and organization. New York: Crown Publishers. ISBN 0-517-54478-4.
  • Mills, T.F.; Buyers, Christopher (12 September 2006). "Land Forces of Britain, the Empire and Commonwealth at Regiments.org – King's African Rifles". Geargiveer vanaf die oorspronklike op 15 Oktober 2007. Besoek op 12 September 2007.

Eksterne skakels wysig