Kleinteater

teater in Pretoria

Die Kleinteater is 'n unieke klassieke dramateater in die hartjie van Pretoria se sentrale sakegebied. Die teater is ontwerp deur die Suid-Afrikaanse argitek, Norman Eaton. Die teater het sitplek vir 292 mense[1] en word gebruik vir 'n verskeidenheid van optredes deur studente van Unisa en ander instellings.

Kleinteater
Ingang na die Kleinteater
Ingang na die Kleinteater
Ander name Unisa Kleinteater
Stad of dorp Pretoria
Land Suid-Afrika
Sitplekke 292
Geopen 1961

Geskiedenis wysig

Gedurende Maart 1940 het mej Norah McCullough wat in Suid-Afrika was om kinderkunssentra in die hoofstede te bevorder, die argitek Norman Eaton genader om die sentrum te ontwerp. Bouwerk het in 1941 begin. Teenstrydighede ten opsigte van die funksies en ruimtelike vereistes van die gebou het konstruksie vertraag tot 1946. Intussen is mnr Le Roux Smith in 1943 as die nuwe direkteur van die sentrum aangestel, en hy ontwikkel 'n omvattende teater-ontwikkelingsprogram.

In 1957 is die teater onder die jurisdiksie van die Pretoriase Onderwyskollege geplaas. Weens 'n gebrek aan fondse en verskeie ander ongerymdhede is die teater eers in 1961 voltooi. In dieselfde jaar is die voltooide gebou amptelik aan dr Jordaan, dekaan van die Pretoriase Onderwyskollege oorhandig en die naam Kleinteater/Kunssentrum is amptelik in gebruik geneem. In 1993 is planne deur Maree en Els Argitekte vir veranderinge met betrekking tot onderhoud en algemene instandhouding goedgekeur, en die veranderings is in Augustus 1994 voltooi.

In 1995 verkry Unisa eienaarskap van die Kleinteater/Kunssentrum. Dit is in 2004 tot 'n provinsiale erfenisterrein verklaar en die amptelike naam is verander na die Unisa Kleinteater. Verdere veranderings aan die binnekant van die teater is volgens die vereistes van Suid-Afrikaanse Erfenishulpbronagentskap (SAEHA) aangebring.

Bronne wysig

Eksterne skakels wysig

Verwysings wysig

  1. "Little Theatre: Technical Specifications" (in Engels). Unisa. Geargiveer vanaf die oorspronklike op 16 Maart 2009. Besoek op 27 Junie 2014.