Begrafnisse in die Kremlinmuur-dodeakker in Moskou het in November 1917 begin toe 240 slagoffers van die Russiese Rewolusie in massagrafte aan Rooiplein begrawe is. Die dodeakker is vandag aan weerskante van die Lenin-mausoleum, wat eers in 1924 in hout en in 1929–1930 met stene herbou is. Nadat die laaste massabegrafnis in 1921 daar gehou is, is begrafnisse aan Rooi Plein gereserveer as die laaste eer aan bekende politici, militêre leiers, ruimtevaarders en wetenskaplikes.
’n Deel van die dodeakker aan die Kremlinmuur.
Van 1925 af is begrafnisse vervang deur die plasing van die as van afgestorwenes in die Kremlinmuur self. Begrafnisse is in 1946 hervat met dié van Michail Kalinin. Daar is altesaam 12 individuele grafte; die laaste toevoeging is Konstantin Tsjernenko in Maart 1985. Die laaste mens wie se as in die muur geplaas is, was die Sowjet-minister van verdediging Dmitri Oestinof in Desember 1984.
Die Lenin-mausoleum is die afgelope paar jaar in omstredenheid gehul. Baie mense, soos die laaste Sowjet-staatshoof wyle Michail Gorbatsjof,[1] meen Lenin se lyk moet eindelik begrawe word.
