Laerskool Kensington
Die Laerskool Kensington was die laaste Afrikaansmedium primêre skool in die oostelike voorstede van Johannesburg.
Afrikaans as onderrigmedium is omstreeks 2008 uitgefaseer nadat die skool in 2003 dubbelmedium geword het, waarna dit eentalig Engelsmedium geword en die skool sedertdien bekendstaan as Kensington Primary School. Die skoolgebou is geleë in Cumberlandstraat, Kensington, reg langsaan die tradisioneel Engelsmedium Sir Edmund Hillary Primary School.
Die skool in sy oorspronklike gedaante het op 3 Desember 1991 gesluit, dieselfde dag as die Laerskool Malvern en die Laerskool Johan Rissik in Troyeville nadat die Afrikaanssprekende inwoners in die ooste van Johannesburg jare lank algaande verminder het. Dit het ook gelei tot die samesmelting van die NG gemeente Jeppestown en die NG gemeente Malvern as die NG gemeente Kensington, ook in 1992. Die NG gemeente Belgravia is reeds omstreeks 1980 by Malvern ingelyf en die NG gemeente Bezuidenhoutsvallei min of meer dieselfde tyd by Jeppestown. Die Gereformeerde kerk Johannesburg-Oos in Troyeville het reeds in 1986 ontbind (sien Gereformeerde kerk Johannesburg (herstig)), maar die Nederduitsch Hervormde gemeente Kensington, ’n hanetree vanaf die ou Gereformeerde kerk en NG kerk Jeppestown in Troyeville, het nog tot 2003 uitgehou.
Die eerste skoolhoof van die nuwe Laerskool Kensington, Leon van Eeden, was tydens die laaste drie jaar van die Laerskool Malvern se bestaan daardie skool se hoof. Einde 1991 het vyf van sy personeellede met vervroegde aftrede gegaan, terwyl sewe aangesluit het by Kensington. Hy het in 1994 afgetree en is kort daarna oorlede, waarna hy opgevolg is deur Herman van Schyff. Hy het sy eie lewe in 2006 geneem.
Die nuwe Laerskool Kensington het met sowat 480 leerders begin en dié getal gehandhaaf namate die Afrikaanse leerders ál minder en die Engelse leerders (hoofsaaklik swart) ál meer geword het. Aan die begin het die skool se personeel bestaan uit Van Eeden en sewe van sy personeellede van Malvern, vyf van Johan Rissik en 20 van die ou Kensington. Met die ontbinding van hul skole het ook Johan Rissik se laaste hoof, Joon Kruger, en Kensington s’n, Giel Oberholzer, met pensioen afgetree.
Bron wysig
- (af) "Drie ou skole sluit hul hekke vir die laaste keer", Beeld, 4 Desember 1991.