Lekgalameetse-natuurreservaat

Lekgalameetse-natuurreservaat is 'n bewaarde bergwildernis van 18 718 ha,[1] geleë wes van Ofcolaco in die noordelike Drakensberge van die Limpopo-provinsie, Suid-Afrika. Dit is in die tagtigerjare deur die Lebowa-regering in die vooruitsig gestel as 'n reservaat van 25 000 ha genaamd The Downs-natuurreservaat, wat ontspanningsaktiwiteite, kampe en stapaktiwiteite sou bied. Die huidige geriewe sluit selfsorgakkommodasie, 'n boskamp met houthutte langs 'n stroompie, plaashuise wat as gastehuise dien, en 'n kamp vir skooluitstappies in.

'n Bergkwikkie soek kos in 'n helder bergstroom in Lekgalameetse.

Sedert 2001 word dit deur die Limpopo Toerisme en Parkeraad bestuur. In die noorde grens dit aan die Wolkberg Wildernisarea. Die bewaringsgebied word van wes na oos deurkruis deur die Orrie Baragwanath-pas, wat egter slegs geskik is vir vierwielaangedrewe voertuie. Die westelike hellings word gedreineer deur sytakke van die Mohlapitserivier wat in die Wolkberg ontspring, en 'n paar kilometer suid daarvan by die Olifantsrivier aansluit. "Lekgalameetse" beteken "die plek van water" in die sePedi-taal van die Sekororo-volk, 'n stam van die baPedi.

Die omgewing het 'n wisselende vlinder-fauna. Sedert die middel 1980's het die indringer- en windverspreide pompombossie homself hier gevestig.[2]

Koördinate: 24°08′48″S 30°12′01″O / 24.14667°S 30.20028°O / -24.14667; 30.20028

Verwysings wysig

  1. "Tzaneen: Lekgalameetse-natuurreservaat". Limpopo Toerisme-agentskap. 2013. Geargiveer vanaf die oorspronklike op 5 Julie 2019. Besoek op 5 Julie 2019.
  2. Henderson, Lesley (2014). "Pompom weed". Plant Health and Protection. Agricultural Research Unit. Besoek op 8 April 2020.