Lugbraaier

'n Lugbraaier of waaierbraaier is 'n elektriese kombuistoestel waarin kos deur middel van warmlugsirkulasie gaargemaak word. Hul tegniese ontwerp kombineer die voordele van 'n konvensionele diepbraaier (wat 'n bros kors aan kos soos vleis en slaptjips gee) met dié van 'n konveksie-oond (waarvoor geen diepbraai-olie benodig word nie en wat geen onaangename reuke veroorsaak nie), en net soos die laasgenoemde werk 'n lugbraaier met 'n meganiese waaier wat warm lug binne 'n kookkamer gelykmatig sirkuleer - gewoonlik teen temperature van tussen 180 en 200 °C.

Die binnekant van 'n lugbraaier.

Die Italiaanse onderneming De’Longhi bemark sy dinamiese lugbraaiers as Multifry. Soortgelyke toestelle word onder meer deur die Franse maatskappy Tefal vervaardig

Lugbraaiers word as 'n gesonde alternatief tot diepbraaiers beskou, alhoewel nie alle soorte kos, wat gewoonlik in 'n diepbraaier berei kan word, ook sonder meer in 'n lugbraaier gaargemaak kan word nie. So word 'n koekpan benodig om vloeibare deeg in 'n lugbraaier te bak.

Lugbraaiers kan in drie kategorieë verdeel word:

• statiese lugbraaiers met 'n nie-roterende kookkamer,
• dinamiese lugbraaiers met 'n roterende kookkamer, en
• halogeen-oonde (waarin spesiale halogeenlampe as verwarmingselement ingespan word, met statiese of dinamiese deursigtige glaskookkamers).

Die kookkamer van 'n statiese lugbraaier is net groot genoeg om 'n diepbraaimandjie daarin te plaas. Groter hoeveelhede kos kan in dinamiese lugbraaiers berei word. Die laasgenoemdes is ook geskik vir vars gemaakte slaptjips.