Ivor Norman Richard Davies CMG, FBA, FRHistS (* 8 Junie 1939) is 'n Brits-Poolse geskiedkundige van Walliese afkoms wat met sy werke oor die geskiedenis van Europa, Pole en die Verenigde Koninkryk internasionale bekendheid verwerf het.

Norman Davies
Norman Davies

Gebore 8 Junie 1939
Bolton, Lancashire, Engeland
Burgerskap Vlag van Verenigde Koninkryk Verenigde Koninkryk
Vlag van Pole Pole (sedert 2014)
Vakgebied Europese geskiedenis
Instelling(s) Skool vir Slawiese en Oos-Europese studies, Universiteitskollege in Londen
Wolfson-kollege, Universiteit van Oxford
Alma mater Magdalen College, Universiteit van Oxford (B.A. Hons)
Universiteit van Sussex (MA)
Jagiellonian University (PhD)
Toekennings Orde van die Wit Arend
Orde van verdienste van die Republiek van Pole

Akademiese loopbaan wysig

Davies is as seun van Richard en Elizabeth Davies in Bolton, Lancashire gebore. Hy het sy akademiese opleiding tussen 1957 en 1958 in Grenoble, Frankryk en daarna onder A. J. P. Taylor aan die Magdalen-kollege te Oxford ontvang waar hy in 1962 die graad B.A. in Geskiedenis verwerf het. Vier jaar later het Davies die graad M.A. aan die Universiteit van Sussex ontvang en daarnaas ook in Perugia, Italië gestudeer. Hy was daarna van voorneme om akademiese opleiding vir die graad Ph.D. in die Sowjetunie te volg, maar nadat sy aansoek om 'n visum nie goedgekeur is nie, het hy sy studies aan die Jagielloniese Universiteit te Kraków, Pole voortgesit waar hy navorsing oor die Pools-Sowjet-Russiese Oorlog gedoen het. Aangesien hierdie oorlog in die destydse amptelike Poolse historiografie geïgnoreer is, was Davies genoodsaak om die titel van sy afhandeling na Die Britse buitelandse beleid teenoor Pole, 1919-20 te wysig. Nadat die graad Ph.D. in Kraków in 1968 aan Davies toegeken is, het die Engelse weergawe van die teks in 1972 onder die titel White Eagle, Red Star. The Polish-Soviet War 1919-20 verskyn.

Vanaf 1971 het Davies Poolse geskiedenis by die Skool vir Slawiese en Oos-Europese Studies aan die Universiteit van Londen gedoseer waar hy in 1985 as professor aangewys is. Hy het hierdie pos tot en met sy aftreding in 1996 beklee. Hy was vervolgens tussen 1997 en 2006 'n Supernumerary Fellow by die Wolfson-kollege in Oxford. Tydens sy loopbaan het Davies in 'n verskeidenheid lande gedoseer, waaronder die Verenigde State, Kanada, Australië, Japan, die Volksrepubliek China, Pole en die meeste ander Europese lande.

Privaat lewe wysig

Norman Davies is getroud met Maria Korzeniewicz, 'n Poolse dosent en boorling van Dąbrowa Tarnowska. Uit die huwelik is twee seuns gebore. Norman Davies woon tans in Oxford en Kraków. In Julie 2014 het Davies Poolse burgerskap aanvaar.[1]

Verwysings wysig

Eksterne skakels wysig