Parlement van Namibië

Die parlement van Namibië (Duits: Parlament von Namibia, Engels: Parliament of Namibia) is die nasionale wetgewer van die Republiek van Namibië. Die Parlement is geleë in Windhoek, Namibië. Dit bestaan tans uit twee kamers:

  • 'n Laerhuis: Die Nasionale Vergadering (National Assembly) bestaan uit 104 lede waarvan 96 verkies word in 'n parlementêre verkiesing, terwyl die ander 8 deur die president aangewys word. Die kamer is hoofsaaklik betrokke met die skryf en goedkeuring van wetgewing.
  • 'n Hoërhuis: Die Nasionale Raad (National Council) bestaande uit 42 lede. Hierdie liggaam adviseer die Nasionale Vergadering en keer wetgewing vir die laaste keer goed voordat dit na die president gaan vir beslissing.
Die Tintenpalast in Windhoek huisves vandag net die Nasionale Vergadering. Dit het vanaf onafhanklikheid in 1990 tot 2002 beide huise geakkomodeer.

Nasionale Vergadering wysig

 
Vergadersaal van die Nasionale Vergadering.

Die Nasionale Vergadering is net na onafhanlikheid in 1990 in die lewe geroep. Dit het die Grondwetlike Vergadering opgevolg en die heel eerste groep lede is op Onafhanklikheidsdag in 1990, ingehuldig. Elke groep nuwe lede word op Onafhanklikheidsdag ingehuldig. Die kamer bestaan uit 104 lede (96 verkies en 8 aangewys). Die verkose lede word deur 'n stelsel van proporsionele verteenwoordiging verkies. Dit het tot die 2014-verkiesing bestaan uit 78 setels waarvan 72 verkies is en 6 deur die president aangestel is.

Die speaker lei die sittinge en word deur 'n adjunkspeaker bygestaan. Sedert Maart 2015 is die speaker Peter Katjavivi van die regerende SWAPO. Die adjunkspeaker is Loide Kasingo en sy beklee al die amp sedert 2010. Sy is ook 'n lid van SWAPO.[1]

Die SWAPO het tans 'n meerderheid in die Nasionale Vergadering omdat hulle 71 uit die 104 setels beklee. Geen ander party het Namibië nog sedert onafhanklikheid regeer nie.

Die Eerste minister word deur die grootste party in die kamer aangewys en dan deur die president amptelik aangestel. Die leier van die grootste party buite die regering word na verwys as die Leier van die Amptelike Opposisie. Alle kabinetslede is lede van die Nasionale Vergadering.

Nasionale Raad wysig

Die Nasionale Raad is in 1990 saam met die Nasionale Vergadering gestig. Die Nasionale Raad het maar net 42 lede wat deur streeksrade verkies is. Die voorsitter en adjunkvoorsitter lei die verrigtinge. Bernard Sibalatani is sedert Desember 2019 die voorsitter, terwyl Victoria Kauma die adjunkvoorsitter is. Albei is lede van SWAPO.

Verwysings wysig

  1. Iikela, Sakeus (23 Maart 2020). "Katjavivi retains speaker post" (in Engels). Geargiveer vanaf die oorspronklike op 8 Junie 2020. Besoek op 8 Junie 2020.

Eksterne skakels wysig