Patrick Gallois
| Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Patrick Gallois (gebore in 1956) is 'n Franse fluitspeler en dirigent.
Gallois is in Linselles naby Lille in die noorde van Frankryk gebore. Hy het op die ouderdom van sewentien jaar met sy studies aan die Paryse Konservatorium onder die gevierde fluitspeler Jean-Pierre Rampal begin en na twee jaar eerste prys ontvang. Teen 21 het hy die hooffluitspeler van die Orchestre National de France onder Lorin Maazel geword. Hy het van 1977 tot 1984 in dié kapasiteit gedien. In 1984 het hy sy pos verlaat vir 'n loopbaan as 'n fluitsolis en later, dirigent.
Gallois het reeds onder verskeie bekende dirigente gespeel, insluitende Leonard Bernstein, Karl Böhm, Pierre Boulez, Sergiu Celibidache, Eugen Jochum, en Seiji Ozawa. Hy neem ook gereeld deel aan kamermusiek saam met musikante soos Juri Bashmet, Jörg Demus, Natalia Gutman, die Lindsay Strykkwartet en Peter Schreier. Hy het vantevore ook saam met Jean-Pierre Rampal en die harpspeelster Lily Laskine gespeel. Galois het 'n eksklusiewe opname-kontrak met Deutsche Grammophon gehad, en het meer onlangs opnames saam met Naxos gemaak. Sy diskografie sluit 75 opnames in. Hy gee sedert 1999 klas aan die Accademia Musicale Chigiana. Gallois was vanaf 2003 tot 2012 die musikale direkteur (hoofdirigent) van die Jyväskylä Sinfonia in Jyväskylä, Finland. Hy het saam met die orkes in Europa en Japan getoer.
Bronne wysig
Eksterne skakels wysig
- Patrick Gallois- Accademia Musicale Chigiana
