Percy Lebaron Spencer (* 19 Julie 1894, † 8 September 1970) was 'n Amerikaanse ingenieur wat bekendheid verwerf het as die uitvinder van die mikrogolfoond.[1]

Percy Spencer
Gebore
Percy Lebaron Spencer

19 Julie 1894
Howland, Maine
Sterf8 September 1970 (op 76)
NasionaliteitVlag van Verenigde State van Amerika Verenigde State
BeroepIngenieur en uitvinder
Bekend virUitvinding van die mikrogolfoond
EggenootLouise Spencer
Lillian Ottenheimer Spencer
KindersJames, John en George

Spencer, 'n boorling van Howland in die deelstaat Maine, het al op 'n jong ouderdom 'n weeskind geword nadat sy pa oorlede is en sy ma hom verlaat het. Hy is deur sy oom en tannie grootgemaak.

Onder die indruk van die RMS Titanic-seeramp het hy in 1912 as radioseiner by die Amerikaanse Vloot aangesluit en is in 1925 by die Amerikaanse wapenvervaardiger en elektronikareus Raytheon aangestel. Ondanks sy beperkte formele skoolopleiding het hy as outodidak 'n suksesvolle loopbaan as elektriese ingenieur begin waartydens hy sowat 150 patente onteikkel het. Hy het onder meer die pos van senior visepresident van Raytheon beklee.

As ingenieur in diens van Raytheon het Spencer gedurende die Tweede Wêreldoorlog 'n meer doeltreffende metode ontwikkel om magnetrons vir radarstelsels te vervaardig, en sodoende 'n belangrike tegnologiese en strategiese voorsprong aan die westelike geallieerde moondhede besorg. Terwyl daar in 1941 nog slegs 17 magnetrons per dag vervaardig kon word, het Spencer navorsing gedoen om 'n eenvoudiger toestel te ontwerp wat geskik was vir massaproduksie. Die vervaardiging van magnetrons kon tot 2 600 eenhede per dag opgestoot word.

Spencer word egter veral onthou as die vader van die mikrogolfoond. Alhoewel deskundiges en tegnici al voor hom die stralingsenergie van mikrogolwe raakgesien het, het hulle uit vrees vir gesondheidsgevare geen verdere ondersoek ingestel nie. Toe Spencer per ongeluk ontdek het dat mikrogolwe sjokolade in sy broeksak kon smelt, was hy nuuskierig genoeg om met springmielies te eksperimenteer. Vir hom was die gaarmaakopsie van mikrogolf-stralingsenergie interessant genoeg om die eerste mikrogolfoond te ontwikkel. Sy werkgewer het hom vir sy mikrogolfpatent - 'n toestel waarin kos gaargemaak kon word - $2 betaal, soos deur sy werkkontrak bepaal is.

Die tegnologie is deur Raytheon verder ontwikkel. Ná die oorname van Amana Refrigeration in 1965 het die onderneming oor die geriewe beskik om mikrogolfoonde op groot skaal te vervaardig.

Verwysings wysig

  1. "National Inventors Hall of Fame. Besoek op 16 Februarie 2015". Geargiveer vanaf die oorspronklike op 23 Februarie 2015. Besoek op 16 Februarie 2015.