Pigalle
Pigalle is 'n kwartier in die Franse hoofstad Parys wat rondom die plein Place Pigalle strek en aan weerskante van twee groot lane, Boulevard de Clichy en Boulevard Rochechouart, geleë is. Die gebied, wat oor die 9de en 18de stadsdistrikte (arrondissements) strek, staan tradisioneel as een van die voorste vermaaklikheidsbuurte in Parys bekend. Dit is vernoem na die beedhouer Jean-Baptiste Pigalle (1714–1785).
Dit is nie net sy ligging aan die voet van die beroemde Montmartre-heuwel nie, maar sy reputasie as rooiligdistrik met neonreklame, talle sekswinkels, nagkroeë en die Museum van Erotisisme wat van Pigalle 'n gewilde toeristetrekpleister en een van die spilpunte van die Paryse naglewe gemaak het.
'n Verskeidenheid kabaretteaters en ander vermaakplekke word in Pigalle aangetref, waaronder teaters van wêreldfaam soos Moulin Rouge, Divan du Monde, Élysée Montmartre, La Cigale, Boule Noire, Les Trois Baudets en Le Trianon. Die kwartier word daarnaas met die Paryse kunslewe verbind. Hier was die ateljee van die skilder Henri de Toulouse-Lautrec geleë, terwyl Pablo Picasso, Vincent van Gogh en Maurice Neumont dit as hul Paryse woonplek gekies het, net soos die skrywer en digter Andre Breton. In 1928 het die Frans-Amerikaanse danseres, sangeres en aktrise Josephine Baker haar eerste nagklub langsaan Breton se woonstel geopen. Werke van Salvador Dalí word in die nabygeleë Espace Dalí vertoon.
Eksterne skakels wysig
Wikimedia Commons het meer media in die kategorie Pigalle.
