Robert J. Flaherty

Robert Joseph Flaherty [ˈflæərti] (* 16 Februarie 1884, † 23 Julie 1951) was 'n Amerikaanse rolprentmaker wat in 1922 die regie en die vervaardiging van die eerste kommersieel suksesvolle vollengte-dokumentêr, Nanook of the North, behartig het. Flaherty se reputasie is op dié rolprent gebou, en geen van sy latere werke sou dieselfde sukses behaal nie, alhoewel hy die nuwe filmgenre van dokumentêre fiksie verder ontwikkel het met rolprente soos Moana (1926), wat in die Suidsee afspeel, en Man of Aran (1934) wat op die afgeleë Ierse Aran-eilande ontstaan het.

Robert J. Flaherty
Gebore	Robert Joseph Flaherty 16 Februarie 1884 Iron Mountain, Michigan, VSA
Sterf	23 Julie 1951 Dummerston, Vermont, VSA
Nasionaliteit	Verenigde State
Beroep	Rolprentmaker en -regisseur
Eggenoot	Frances Johnson Hubbard (1914-1951)

Vir sy dokumentêre fiksie-rolprente het Flaherty as eerste regisseur dokumentêre materiaal met narratiewe en poëtiese elemente verbind. Hy word ook as baanbreker van die etnografiese film beskou, 'n genre wat deur Jean Rouch en John Collier Jr. in die 1960's as visuele antropologie, 'n onderafdeling van antropologie, geklassifiseer is.

Flaherty was vanaf 1914 tot sy afsterwe in 1951 getroud met die skryfster Frances Hubbard Flaherty. Sy het met haar gade by verskillende filmprojekte saamgewerk en is vir Louisiana Story (1948) vir 'n Academy Award (Oscar) in die kategorie "Beste oorspronklike draaiboek" genomineer.

Filmografie

Nyla, wat die rol van Nannok se vrou in Nanook of the North vertolk het, met haar kind

• Nanook of the North (1922)
• The Pottery Maker (1925)
• Moana (1926)
• The Twenty-four Dollar Island (1927), 'n kort dokumentêr oor New York
• White Shadows in the South Seas (1928)
• Acoma the Sky City (1929; onvoltooi)
• Tabu (1931), in samewerking met F. W. Murnau
• Industrial Britain (1931)
• Man of Aran (1934)
• Elephant Boy (1937)
• The Land (1942), 'n 45-minute-dokumentêr wat vir die Amerikaanse Departement van Landbou vervaardig is
• Louisiana Story (1948)
• The Titan: Story of Michelangelo (1950)