Rotten Tomatoes

webtuiste oor rolprente

Rotten Tomatoes is ’n webtuiste wat in 1998 begin is en gewy word aan rolprentresensies en -nuus. Televisie word ook nou gedek. Die naam is afgelei van die ou gebruik dat gehore vrot tamaties gegooi het wanneer hulle nie van ’n verhoogoptrede gehou het nie. Die maatskappy is deur Senh Duong gestig en word sedert Januarie 2010 besit deur Flixster, wat op sy beurt in 2011 deur Warner Bros. oorgeneem is.

Rotten Tomatoes
URL rottentomatoes.com
Kommersieel? Ja
Soort webwerf Rolprentresensies en -nuus
Registrasie Opsioneel
Gelanseer 12 Augustus 1998 (1998-08-12) (25 jaar oud)
Huidige status Aktief

Beskrywing wysig

Rotten Tomatoes is een van die topduisend webtuistes wêreldwyd (sowat 550ste).[1] Unieke besoekers aan is sowat 26 miljoen, volgens Quantcast.[2]

Die personeel van Rotten Tomatoes versamel eers aanlyn resensies van skrywers wat gesertifiseerde lede van verskeie skrywersgildes of resensente-organisasies is. Om as ’n resensent aanvaar te word, moet die persoon se oorspronklike resensies ’n sekere getal "likes" van gebruikers kry. Dié wat as "topresensente" geklassifiseer word, skryf gewoonlik vir groot koerante. Die personeel besluit of ’n resensie positief is ("vars", aangedui deur ’n klein ikoon van ’n rooi tamatie) of negatief ("vrot", aangedui deur ’n klein ikoon van ’n groen tamatie wat spat).

Ikoon Telling Beskrywing
  75-100% As vars gesertifiseer. Prente wat deur minstens 40 resensente geresenseer is
(insluitende 5 topresensente) kry dié ikoon. Hulle verloor die ikoon as hul telling onder 70% daal.
  60-74% Vars. Die uitsondering, "60–<74%", is wanneer ’n prent deur minstens 40 resensente beoordeel is (insluitende 5 topresensente).
  0-59% Vrot. Prente met so ’n telling kry dié ikoon.

Die webtuiste hou telling van al die resensies vir elke rolprent en die persentasie positiewe resensies word bereken. (Groot prente wat kort tevore uitgereik is, kan tot 300 resensies kry.) As die positiewe resensies 60% or meer uitmaak, word die prent as "vars" beskou omdat die meeste resensente daarvan hou. As die positiewe resensies minder as 60% is, word die prent as "vrot" beskou.

Topresensente soos Roger Ebert, Desson Thomson, Stephen Hunter, Owen Gleiberman, Lisa Schwarzbaum, Peter Travers en Michael Phillips word in ’n aparte lys aangedui en hul resensies word apart bereken. Hul opinies word ook in die algemene telling ingesluit.

Verwysings wysig

  1. "rottentomatoes.com" (in Engels). Alexa. Geargiveer vanaf die oorspronklike op 7 Mei 2020. Besoek op 28 November 2014.
  2. "rottentomatoes" (in Engels). Quantcast. Geargiveer vanaf die oorspronklike op 10 Augustus 2017. Besoek op 28 November 2014.