Royal Shakespeare Company
Die Royal Shakespeare Company (RSC) is 'n vooraanstaande Britse teatergeselskap wat werksaam is in William Shakespeare se geboortedorp, Stratford-upon-Avon. Met nagenoeg 700 werknemers bring hierdie geselskap ongeveer 20 produksies elke jaar op die planke, nie alleenlik in hulle tuisdorp nie, maar ook op toer in plekke soos Londen en Newcastle. Die RSC lewer hoofsaaklik uitvoerings van toneelstukke deur Shakespeare en sy tydgenote, maar is ook betrokke by die uitvoering van meer moderne teaterstukke, soos dié van Harold Pinter, Tom Stoppard, Eugene O'Neill, Arthur Miller en Claude-Michel Schoenberg. Daarbenewens werk hulle ook aktief aan opvoedingsprojekte wat daarop mik om 'n liefde vir Shakespeare by onderwysers en jong leerders te kweek. Een voorbeeld hiervan is die 2008 manifes 'Stand Up for Shakespeare', wat 'n veldtog geloods het om jongmense aan Shakespeare se toneelstukke in die konteks van lewende teater-uitvoerings bloot te stel.
Die RSC is formeel gestig op 20 Maart 1961, met 'n aankondiging dat Stratford se bestaande Shakespeare Memorial Theatre voortaan bekend sou staan as die Royal Shakespeare Theatre, en dat die geselskap wat in hierdie teater werksaam was die Royal Shakespeare Company sou heet. Peter Hall was die stigtende artistieke direkteur (1960—1968), en is opgevolg deur Trevor Nunn (1968—1986), Terry Hands (1978—1991) (Nunn en Hands het vir ongeveer agt jaar lank saam die artistieke direkteurskap behartig), Adrian Noble (1991—2003), Michael Boyd (2003—2012), en Gregory Doran (2012—). Die periodes onder Hands en Noble se leierskap was 'n moeilike fase vir die geselskap, waarin 'n professionele assosiasie met die Barbican Sentrum in Londen stopgesit is met opeenlopende negatiewe finansiële gevolge.
Die geselskap se 50ste herdenkingsjaar is in 2011 gevier met uitvoerings van Macbeth en The Merchant of Venice, asook 'n hergekonstrueerde verlore toneelstuk genaamd The History of Cardenio. Tydens die kulturele olimpiade wat gepaard gegaan het met die Olimpiese Somerspele 2012 en die Paralimpiese Somerspele 2012 het die RSC 'n internasionale Shakespeare fees (die World Shakespeare Festival) vervaardig, met kunstenaars van regoor die wêreld wat teatervertonings van Shakespeare se werke op verskeie plekke in die Verkenigde Koninkryk opgevoer het. In 2013 het die RSC begin om lewende uitsendings van produksies internasionaal te versprei.