Siberiese kraton

Die Siberiese kraton of Angaraland is in die hartjie van Siberië geleë en beslaan die huidige Sentraal-Siberiese Plato. Dit is ’n uiters antieke kraton wat voor die Perm-periode ’n aparte kontinent, Siberia, gevorm het.

Die Siberiese kraton se huidige ligging in Asië.

Prekambriese geskiedenis wysig

Sowat 2,5 miljard jaar gelede het die Siberiese kraton saam met die Kanadese Skild deel uitgemaak van die kontinent Arktika. Sowat 1,1 miljard jaar gelede het dit deel geword van die superkontinent Rodinië, totdat laasgenoemde sowat 750 miljoen jaar gelede verbrokkel het. Die kraton het toe deel van die kleiner superkontinent Protolaurasië geword. Sowat 600 miljoen jaar gelede het Protolaurasië deel geword van die groot suidelike superkontinent Pannotië, maar sowat 50 miljoen jaar later het beide Pannotië en Protolaurasië verdeel en die kontinente Laurentia, Baltica en Siberia geword.

Paleosoïese geskiedenis wysig

Siberia was ’n aparte kontinent deur die Vroeë Paleosoïkum totdat dit tydens die Karboon-periode met die kleiner kontinent Kazachstanië gebots het. Nog ’n botsing met Baltica tydens die Perm het gelei tot die vorming van die superkontinent Pangea en die Siberiese Trappe.

Mesosoïkum en Kainosoïkum wysig

Pangea het tydens die Jura opgebreek, hoewel Siberia en Laurasië aaneengebly het. Laurasië het tydens die Kryt geleidelik verbrokkel en Siberia het deel gebly van die huidige noordoostelike Eurasië.

Die Siberiese kraton is vandag deel van die klein superkontinent Afro-Eurasië. Oor sowat 250 miljoen jaar kan Siberia in die subtropiese streek val en deel vorm van ’n nuwe superkontinent, Pangea Ultima.

Eksterne skakels wysig