Skemerkelkie
Wanneer dit na ’n gemengde drankie verwys, kan skemerkelkie enige drankie beteken met een of meer bestanddele, waarvan minstens een alkohol bevat.
Gebruik wysig
Die eerste aangetekende gebruik van die Engelse woord cocktail was op 20 Maart 1798 in The Morning Post and Gazetteer in London, England.[1] Die eerste definisie van die woord as ’n alkoholiese drankie kom voor in die uitgawe van 13 Mei 1806 van The Balance and Columbian Repository, ’n publikasie in Hudson, New York. In Afrikaans het die neologisme "skemerkelkie" ingeburger geraak om die Engelse term, wat internasionaal gebruiklik is (so onder meer in Nederlands en Duits), te vermy, net soos skemerkroeg (cocktail bar).[2]
Ontwikkeling wysig
Daar is onduidelikheid oor die oorsprong van die skemerkelkie.[3] Dit was tradisioneel ’n mengsel van spiritualieë, suiker, water en bitters.[4] Teen die 1860's het dit egter dikwels ’n likeur bevat.[5][6]
Die eerste kroeggids wat skemerkelkies ingesluit het, was in 1862: How to Mix Drinks; or, The Bon Vivant's Companion, deur Jerry Thomas. Onder die baie soorte drankies was daar 10 resepte vir "skemerkelkies". ’n Sleutelbestanddeel wat dié drankies van ander onderskei het, was bitters.
Tydens die Amerikaanse drankverbod (1919–1933), toe alkoholiese drankies verbode was, is skemerkelkies steeds onwettig gedrink.[7] Jenewer is gedrink in plaas van whisky omdat dit nie hoef te verouder nie en dus makliker was om onwettig te vervaardig.[8] Heuning, vrugtesap en ander smaakmiddels is bygevoeg om die smaak van die swakker soorte drank te verdoesel. Soet skemerkelkies was makliker om vinnig te drink, en dit was belangrik omdat niemand geweet het wanneer die volgende klopjag sou plaasvind nie.
Skemerkelkies het in die 1960's en 1970's ongewilder geraak, totdat dit in die 1980's ’n heropbloei beleef het met ander drankies in die plek van jenewer. Tradisionele skemerkelkies het in die 2000's weer ’n terugkeer beleef.[9]
Verwysings wysig
- ↑ Jared Brown & Anistatia Miller (2009). Spirituous Journey: A History of Drink, Book Two. Mixellany Limited. ISBN 0-9760937-9-0.
- ↑ www.dbnl.org - Bruce Donaldson: The Influence of English on Afrikaans. Besoek op 7 Maart 2016
- ↑ "The surprising history of the cocktail". telegraph.co.uk (in Engels). Geargiveer vanaf die oorspronklike op 8 Julie 2017. Besoek op 13 Desember 2012.
- ↑ Thomas, Jerry (1862). How To Mix Drinks.
- ↑ "The Democracy in Trouble". Chicago Daily Tribune. 1880: 4. 15 Februarie 1880. Geargiveer vanaf die oorspronklike op 14 Maart 2014. Besoek op 26 Junie 2014.
- ↑ Thomas (1862). How to mix drinks: or, The bon-vivant's companion...
- ↑ Regan, Gary (2003). The Joy of Mixology. Potter.
- ↑ Eric Felton (28 November 2008). "Celebrating Cinco de Drinko". The Wall Street Journal.
- ↑ Anthony Dias Blue (2004). The Complete Book of Spirits. Harper Collins. p. 58.
Eksterne skakels wysig
- "Diageo Masterclass, Cocktail recipes with Whiskey"
Wikimedia Commons het meer media in die kategorie Skemerkelkie.
Hierdie artikel is vertaal uit die Engelse Wikipedia
