Skotse Rugbyunie
Die Skotse Rugbyunie (Engels: Scottish Rugby Union, afgekort “SRU”; Skots-Gaelies: Aonadh Rugbaidh na h-Alba) is die bestuursliggaam wat rugby en sewesrugby in Skotland beheer. Die beheerliggaam is in 1879 gestig en by Murrayfield-stadion in Edinburg gesetel. Sedert 1886 verteenwoordig dit Skotland by Wêreldrugby en ook by Rugby Europa (“RE”).
| Skotse Rugbyunie | |
|---|---|
 Kenteken van die Skotse Rugbyunie
| |
| Engelse naam | Scottish Rugby Union |
| Afkorting | SRU |
| Skots-Gaeliese naam | Aonadh Rugbaidh na h-Alba |
| Land |  Skotland
|
| Sportsoorte | Rugby, Sewesrugby |
| Gestig op | 3 Maart 1873 |
| Gestig in | Glasgow, Skotland |
| Lid van | Wêreldrugby |
| Aangesluit in | 1886 (Stigtingslid) |
| Vastelandse beheerliggaam | Rugby Europa |
| Patroon | Anne Mountbatten-Windsor |
| President | Ian Barr |
| Setel | Murrayfield-stadion, Edinburg, Skotland |
| Amptelike tale | Engels en Skots-Gaelies |
| Amptelike webwerf | scottishrugby.org |
Geskiedenis wysig
Die Skotse Rugbyunie is in 1873 gestig as die Skotse Voetbalunie (Scottish Football Union, SFU).[1] Daarmee is dit naas die Engelse Rugbyvoetbalunie (RFU) die tweede oudste beheerliggaam in die rugbygeskiedenis.[2] In 1886 het die SFU saam met die Ierse Rugbyvoetbalunie (IRFU) en die Walliese Rugbyunie (WRU) die Internasionale Rugbyvoetbalraad (IRVR, nou Wêreldrugby) gestig.[3] In 1924 is die Skotse Voetbalunie hernoem in Skotse Rugbyunie. Met die aansluiting van die Fédération Internationale de Rugby Amateur (FIRA; nou Rugby Europa) by die IRR in 1999 het Skotland ook ’n lid van dié kontinentale beheerliggaam geword.[4]
Taak wysig
Die Skotse Rugbyunie organiseer verskeie nasionale spanne, insluitend Skotland se nasionale seniormansrugbyspan, vroue en jeug, asook die nasionale ligastelsel wat as die “Scottish League Championship” bekendstaan. Die SRU hou ook toesig oor sewesrugby in Skotland en aangesien dit ’n Olimpiese sportsoort is, werk hulle met die Britse Nasionale Olimpiese Komitee saam. Naas die amptelike nasionale span roep die SRU ook ander keurspanne byeen. Scotland A is die tweede nasionale span van Skotland. Daarbenewens bestuur die beheerliggaam kinder- en jeugrugby in Skotland. Kinders en jongmense word reeds op skool aan rugby bekend gestel en na gelang van hul belangstelling en talent begin hul met hul afrigting. Skotland beskik oor ’n nasionale span vir studente, die Schoolboys, wat as ’n voorbereiding op die Skotse nasionale rugbyspan dien. Net soos ander rugbylande beskik Skotland oor ’n o/20-nasionale span wat aan die o/20-Sesnasies-toernooi en die Wêreldrugby o/20-kampioenskap deelneem.[5][6]
Die Skotse Rugbyunie organiseer ook gereeld internasionale toernooie. Hulle het al opgetree as gasheer van die rugbywêreldbekertoernooie in 1991 en 1999 (albei saam met die ander destydse Vyfnasies), asook die Rugbywêreldbeker 2007 (saam met Frankryk en Wallis). Saam met die Engelse Rugbyvoetbalunie, die Franse Rugbyfederasie, die Ierse Rugbyvoetbalunie, die Italiaanse Rugbyfederasie en die Walliese Rugbyunie organiseer hulle die jaarlikse Sesnasies-toernooi, die vernaamste rugbytoernooi in die Noordelike Halfrond.
Die beheerliggaam reël ook die plaaslike kompetisies. Die belangrikste rugbyliga in Skotland is die Verenigde Rugbykampioenskap, waaraan 14 spanne uit Ierland, Italië, Skotland, Suid-Afrika en Wallis deelneem, waaronder die twee Skotse spanne Edinburgh Rugby en Glasgow Warriors. Benede word die Skotse Premierskap tussen tien spanne uitgespeel. Bo die nasionale kampioenskap word jaarliks saam met klubs uit Engeland, Frankryk, Ierland, Italië, Suid-Afrika en Wallis die Europese Rugbykampioenskapbeker en die Europese Rugbyuitdagingsbeker uitgespeel.
Dit word as ’n groot prestasie beskou om saam met die Britse en Ierse Leeus na die Suidelike Halfrond te toer, waar hulle sowat al om die vier jaar teen die Nieu-Seelandse All Blacks, die Suid-Afrikaanse Springbokke of die Australiese Wallabies speel.[7]
Kenteken wysig
Die dissel is die nasionale blom van Skotland en ook die embleem van die Skotse nasionale rugbyspan. Volgens ’n legende het die “beskermende dissel” sy rol gespeel tydens die verdediging van Skotland teen ’n snagse aanval deur Noorse Wikings, een van hulle skree van pyn toe hy kaalvoet op ’n dissel trap, wat die Skotse verdedigers waarsku. Die Latynse Nemo me impune lacessit (“Niemand ontlok my ongestraf nie!” in Afrikaans) is ’n antieke leuse van die Skotse monarge, en ook van die voorste ridderorde van Skotland, die oudste en edelste orde van die dissel, en van die Skotswagte (waarvan die twee laasgenoemde aan die monarg “behoort” het).[8]
Sien ook wysig
Verwysings wysig
- ↑ (en) "History". Skotse Rugbyunie. Geargiveer vanaf die oorspronklike op 31 Oktober 2020. Besoek op 31 Oktober 2020.
- ↑ (en) "History of the game". Engelse Rugbyvoetbalunie. Geargiveer vanaf die oorspronklike op 10 Januarie 2014. Besoek op 10 Januarie 2014.
- ↑ (en) "Scotland". Wêreldrugby. Besoek op 29 Maart 2024.
- ↑ (en) "About us". Rugby Europa. 2020. Besoek op 29 Maart 2024.
- ↑ (en) "Scotland U20". Sesnasies. Geargiveer vanaf die oorspronklike op 9 Oktober 2023. Besoek op 9 Oktober 2023.
- ↑ (en) "World Rugby U20 Championship". Wêreldrugby. Besoek op 29 Maart 2024.
- ↑ (en) "British & Irish Lions". Britse en Ierse Leeus. Besoek op 29 Maart 2024.
- ↑ (en) "The Scottish Thistle – Beautifully Bold!". Scottish at Heart. Besoek op 29 Maart 2024.