Stanislaf Petrof

Stanislaf Ewgrafowitsj Petrof (Russies: Станислав Евграфович Петров; * 7 September 1939 in Wladiwostok, Sowjetunie; † 19 Mei 2017 in Frjazino, Rusland) was 'n afgetrede luitenant-kolonel van die Sowjet-krygsmagte wat op 26 September 1983 'n moontlike kernoorlog voorkom het. Die Sowjetunie se Oko-waarskuwingstelsel het dié dag aangedui dat die Verenigde State vyf interkontinentale missiele in die rigting van die Sowjetunie gevuur het. Petrof was ten tye van die voorval die wagkommandant in Moskou se Serpoechof-15-bunker. Hy het die voorval as 'n vals alarm aangemeld. As hy dit as 'n aanval aangemeld het, sou die USSR moontlik 'n volskaalse kernbomaanval teen die VSA en sy bondgenote geloods het.

Stanislaf Ewgrafowitsj Petrof
Станислав Евграфович Петров
Stanislaf Petrof

Stanislaf Petrof in 2016

Geboortedatum 7 September 1939
Geboorteplek Wladiwostok, Sowjetunie
Sterfdatum 19 Mei 2017 (op 77)
Sterfplek Frjazino, Moskou-oblast, Rusland
Lojaliteit Vlag van Sowjetunie Sowjetunie
Diens/Tak Sowjetse Lugmag
Jare in diens 1972–1984
Rang Luitenant-kolonel
Veldslae/oorloë Koue Oorlog
Toekennings Dresden-prys (2013)
Petrof ontvang die Dresden-prys in 2013

Die voorval het plaasgevind op 'n tydstip dat die Koue Oorlog 'n hoogtepunt bereik het ná die afskiet van Korean Air-vlug 007 drie weke vroeër. Petrof het gedink dis vreemd dat die VSA 'n kernoorlog met net vyf missiele sou begin en het teen sy bevele besluit om dit as 'n vals alarm te rapporteer. Latere ondersoek het getoon dat dit inderdaad 'n vals alarm was. Een van die Oko-satelliete het 'n weerkaatsing van sonlig op hoë wolke geregistreer.

Petrof is oor die voorval ondervra, maar is nie daarvoor gestraf of beloon nie. Op 17 Januarie 2013 is die Dresden-prys aan hom toegeken vir sy rol om die Derde Wêreldoorlog te voorkom.

Eksterne skakels wysig