Wikipedia

Stormwater

Stormwater is water wat na 'n reënbui afloop. Stormwater kan in die grond infiltreer, bo op die oppervlak bly en verdamp, of wegvloei en in strome, riviere of damme beland.

Stedelike afloopwater vloei in 'n stormwatersloot

In 'n natuurlike landskap soos 'n woud of bos, absorbeer die grond die meeste van die stormwater naby aan die plek waar dit val. In omgewings wat ontwikkel is, kan stormwater wat nie goed bestuur word nie, hoofsaaklik twee probleme veroorsaak. Indien die volume te veel raak, kan dit vloedskade aanrig, en indien daar gifstowwe in hierdie stormwater beland, kan dit skadelike gevolge hê waarheen dit ook al vloei, of selfs uiteindelik vir oseaanbesoedeling sorg.

Stormwater is ook 'n waardevolle hulpbron aangesien die wêreldbevolking se verbruik groter is as die beskikbare varswater. Wanneer die stormwater opgegaar en gesuiwer word, kan dit in stedelike gebiede drinkwater voorsien en op hierdie manier sorg vir volhoubaarheid.

Reënwater vloei in 'n afvoerkanaal in

Stormwaterbesoedeling wysig

Oppervlaktes wat ondeurdringbaar is (paaie, parkeerareas, geboue, gekompakteerde grond) laat nie toe dat die reënwater in die grond in filtreer nie en daarom kom daar meer afloopwater voor as in onontwikkelde gebiede. Die ekstra afloopwater kan strome en riviere erodeer en ook sorg vir vloede wanneer die dreineervore te vol is van al die ekstra afloopwater.

Wanneer daar vir 'n rukkie geen reën geval het nie, is die eerste reënbui se afloopwater die ergste besoedel. Hierdie besoedelde water vloei dan in stormwaterslote in, veral in gebiede waar die grootste gedeelte van die oppervlak ondeurdringbaar is. Hierdie hoë konsentrasie besoedelde afloopwater veroorsaak 'n groot probleem met die besoedeling van riviere, damme, mere en oseane.[1][2]:216

Wanneer besoedelende stowwe in die oppervlakwater beland in 'n reënbui, word daarna verwys as besoedelde afloopwater. Mense en hul aktiwiteite sorg dat besoedelende stowwe op paaie, grasperke, huise en geboue se dakke, landerye ens. beland. Wanneer dit reën of indien daar besproei word, is daar altyd afloopwater wat uiteindelik in riviere, mere, damme en die oseaan beland. Alhoewel die besoedelde water effens verdun word wanneer dit in die waterkanale beland, is die aktiwiteite wat die besoedeling veroorsaak so erg dat daar baie besoedelde water in die waterstelsels beland.

Stormwater as 'n bron van besoedeling wysig

 
Stedelike afloopwater stroom in die see in.

Afgesien van die besoedelende stowwe wat in afloopwater beland, is stedelike stormwater ook op 'n ander manier nadelig vir die omgewing. Voordat ontwikkeling plaasgevind het, is die meeste reënwater in die grond opgeneem en op daardie manier het dit die watertafel vol gehou. Dit is ook deur die plantegroei met die hulp van evapotranspirasie terug in die atmosfeer geplaas.

Moderne dreineerstelsels wat water van ondeurdringbare oppervlaktes soos paaie en dakke opvang, sorg dat die water deur middel van pype in strome en riviere beland en enige reënbui beteken daar is meer water in die waterstelsel.

Afgesien daarvan dat die stedelike afloopwater erg besoedel is, kan die verhoogde hoeveelheid water in riviere lei tot erosie. Die gevolg is onkruid wat vermeerder en die natuurlike vloei van die spruit of rivier wat verander. Indringerspesies maak staat op hierdie veranderings vir hul eiers om uit te broei, om die jongelinge te ontwikkel en vir migrasie.

In sekere dele, veral rondom die VSA se kuslyn, is besoedelde afloopwater vanaf paaie en snelweë verantwoordelik vir die meeste waterbesoedeling. 'n Voorbeeld is die besoedeling in die Puget Seestraat in Seattle. 75% van die giftige chemiese stowwe wat die seestraat besoedel is afkomstig van paaie, huise se dakke, industriële gebiede en ander ontwikkeling.[3]

Stedelike oorstromings wysig

Stedelike oorstromings is die oorstroming van grond of eiendom in 'n beboude omgewing wat veroorsaak word deur stormwater wat te veel is om deur dreineerstelsels soos stormwaterslote weggevoer te word. Soms word dit deur fratsvloede, soos tydens 'n wolkbreuk veroorsaak. Alhoewel dit soms volg op iets soos 'n wolkbreuk, word stedelike oorstromings gekenmerk deur die herhaalde, duur en sistemiese impak op gemeenskappe. In gebiede waar dit gereeld voorkom, behoort daar voorkomende maatreëls getref te word om die wegvloei van die afloopwater beter te reguleer en so die verliese te verminder.

Stedelike oorstromings is die primêre oorsaak van die oorstroming van kelders, duikweë en rioolstelsels. Alhoewel daar gewoonlik nie baie lewensverlies is met stedelike oorstromings nie, is die gevolge op die ekonomie en omgewing dikwels groot. Afgesien van die direkte skade aan infrastruktuur (paaie, snelweë en dienste) kan huise wat altyd klam is gekoppel word aan asemhalingsprobleme en ander siektes.[4]

Stedelike oorstromings het belangrike ekonomiese implikasies. In die Amerika is daar industriële spesialiste wat beraam dat nat kelders die waarde van 'n eiendom met tussen 10 en 25 persent kan laat daal. Dit is van die vernaamste redes waarom mense nie dié huise wil koop nie.[5] In die Verenigde Koninkryk word beraam dat stedelike oorstromings in 2007 skade van £270 miljoen in Engeland en Wallis aangerig en sowat 80 000 huise in gevaar was.[6]

Die bestuur van stormwater wysig

 
'n Stormwater-filtrasiestelsel vir stedelike afloopwater

Stormwaterbestuur behels die bestuur van die hoeveelheid en gehalte van die stormwater.[7] In groot wêreldstede bestaan sekere strukture om te help met die bestuur van stormwater. Dit sluit opgaardamme in, waar die besoedelde stormwater behandel kan word. Ander metodes is om die water van die paaie af te vee. Die bestuur van stormwater is tegnies van aard maar dit kan ook seker beheermaatreëls insluit soos: [8]

  • die beheer van oorstromings en erosie;
  • beheer van gevaarlike materiaal en stowwe om te voorkom dat sekere besoedelende stowwe in die omgewing beland;
  • die beplanning en oprigting van stormwaterstelsels wat dit sal moontlik maak om die smetstowwe uit die water te verwyder voordat dit in riviere en damme beland, of voordat dit die grondwater besoedel;
  • die beskerming en rehabilitasie van spruite en riviere;
  • die oprigting van "sagte" strukture soos dreineerslote, vleilande of groen infrastruktuuroplossings om saam met die "harde" strukture soos pype en sementslote te opereer;
  • die uitbreiding van befondsing vir stormwaterprogramme;
  • die ontwikkeling van langtermynprogramme om stormwaterafvoerstelsels op te gradeer en in stand te hou;
  • om voortdurend die stormwaterregulasies te hersien en aan te pas by die behoeftes;
  • verbetering en handhawing van bestaande ordonnansies om seker te maak eiendomsontwikkelaars besin oor die gevolge van stormwater voor, tydens en na die ontwikkeling van hul grond;
  • opvoeding van 'n gemeenskap om mense bewus te maak van die effek wat hulle aktiwiteite op die watergehalte het, en dat daar saam gewerk behoort te word om die gehalte van water te verbeter; en
  • sorgvuldige beplanning om oplossings te vind voordat die probleme te groot word.

Geïntegreerde bestuur van water wysig

 
'n Tuin wat spesiaal ontwerp is om die stormwater van 'n aangrensende parkeerarea te verwerk.

Tydens die ontwikkeling van moderne stede, is daar altyd 'n verhoogde aanvraag na water vir die groeiende bevolking. Klimaatsveranderings het ook 'n impak op die hoeveelheid afloopwater en dit kan tot probleme soos stedelike oorstromings lei. Indien daar 'n waterbestuurstelsel in plek is, kan daar aksie geneem word soos om die stormwater op te vang, die vermoë van die grond te verhoog om die water as grondwater op te neem, en biofiltrasie of sogenaamde reëntuine aan te plant. Dit sal die impak op strome en riviere beheer en ook 'n sekere habitat skep in stedelike gebiede. Nog 'n oplossing is om daktuine, dakke waarop gras en ander plante geplaas word, op te rig. Dis 'n goedkoop metode om afloopwater te beheer.

'n Geïntegreerde waterbeheerstelsel is 'n beweging wat tans nog in sy kinderskoene staan. Hier word verskeie tegnieke bymekaar gebring om 'n oplossing vir die probleem van stormwater te vind. Omdat die tradisionele stormwaterslote se impak op die hele waterstelsel groot is, en omdat water 'n hulpbron is wat toenemend skaarser gaan word, moet dit goed bestuur word. Dit is om te voorkom dat stormwater nie besoedelde water in ons kosbare waterbronne laat beland nie.

 
'n Opvangdammetjie om stormwater te bestuur

Skep publieke bewustheid wysig

Opvoeding is 'n belangrike onderdeel in die bestuur van stormwater. Wêreldwyd is daar organisasies wat projekte loods om die publiek in te lig oor die noodsaaklikheid van die bestuur van stormwater. Mense moet toenemend bewus gemaak word van die besoedeling van stormwater en hoe hulle kan help om die besoedeling te verminder en te beperk.[9]

'n Voorbeeld van so 'n opvoedkundige program is die een in Wes Michigan. Die West Michigan Environmental Action Council (WMEAC), het 'n term geskep, Hydrofilth, waarmee hulle die publiek bewus maak van die besoedeling in stormwater. [10] Dit word deel van die "15 to the River"-veldtog. (Gedurende 'n reënstorm duur dit net 15 minute vir besmette afloopwater van die stad Grand Rapids in Michigan om die Grandrivier te bereik.))[11] Van die aktiwiteite wat die raad aanpak om die probleem aan te spreek is om reëntenks te versprei en huiseienaars aan te moedig om reëntuine aan te plant.[12]

Ander opvoedingsveldtogte fokus op die belangrikheid van groen infrastruktuur en die behandeling van afloopstormwater.[13] Artikels, webtuistes, foto's, video's en ander media maak die publiek bewus van die voordele van die doeltreffende beheer van stormwater.

Geskiedenis wysig

Vandat die mensdom begin het om naby mekaar huise op te rig in dorpies en nedersettings, is die wegvloei van reënwater en gesmelte sneeu wat nie in die grond wegsak nie, 'n probleem. Gedurende die Bronstydperk het die mense al hoe meer in strukture met ondeurdringbare oppervlaktes begin woon, en dit het die probleem van stormwater wat moet wegloop, vererger. Van die oudste voorbeelde van stormwaterstelsels is die wat gevind kan word in Antieke Griekeland.[14]

'n Spesifieke voorbeeld van een van die eerste stormwaterdreineerstelsels kan gesien word by die argeologiese opgrawings van die Minoïese beskawing op Kreta.[15]

Verwysings wysig

  1. ↑ Metcalf, Leonard; Eddy, Harrison P. (1916). American Sewerage Practice: Disposal of Sewage. Vol. III. New York: McGraw-Hill. p. 154.
  2. ↑ Alex Maestre and Robert Pitt; Center for Watershed Protection (2005)." Geargiveer 3 Maart 2016 op Wayback Machine
  3. ↑ Washington State Department of Ecology.
  4. ↑ Indoor Air Quality (IAQ) Scientific Findings Resource Bank (IAQ-SFRB), "Health Risks or Dampness or Mold in Houses" http://www.iaqscience.lbl.gov/dampness-risks-house.html Geargiveer 4 Oktober 2013 op Wayback Machine
  5. ↑ The Prevalence and Cost of Urban Flooding.
  6. ↑ Parliamentary Office of Science and Technology, London, UK.
  7. ↑ Washington State Department of Ecology (2005).
  8. ↑ Debo, Tom; Reese, Andrew (2003). "Chapter 2. Stormwater Management Programs". Municipal Stormwater Management. Boca Raton, FL: CRC Press. ISBN 1-56670-584-3.
  9. ↑ EPA (2013).
  10. ↑ West Michigan Environmental Action Council (WMEAC), Grand Rapids, MI.
  11. ↑ WMEAC. "15 to the River" Geargiveer 10 Maart 2016 op Wayback Machine Besoek op 2013-08-26.
  12. ↑ WMEAC.
  13. ↑ DuPage County Stormwater Management.
  14. ↑ Trimble, Stanley W. (2007). Encyclopedia of Water Science. Boca Raton, FL: CRC Press. ISBN 0-8493-9627-1.
  15. ↑ C. Michael Hogan, "Phaistos Fieldnotes."

Eksterne skakels wysig

Ontsluit van "https://af.wikipedia.org/w/index.php?title=Stormwater&oldid=2620460"