The Copenhagen Post
The Copenhagen Post is ’n weekblad wat Deense nuus in Engels beide nasionaal en internasionaal aanbied; dit is die enigste Engelstalige koerant wat in Denemarke uitgegee word. Dit is in November 1997 deur San Shepherd gestig en het ’n weeklikse sirkulasie van tussen 12 000 en 15 000. Die huidige hoofredakteur is Kevin McGwin.
Geskiedenis wysig
Hoewel die weekblad in 1997 gestig is, het die gedrukte weergawe van The Copenhagen Post eers in Februarie 1998 die lig gesien. Sedert 2000 is The Copenhagen Post deur Ejvind Sandal uitgegee. In 2002 het Jesper Nymark as Hoofuitvoerende Beampte ingetree.
Inhoud wysig
The Copenhagen Post is geskoei rondom die redaksionele samewerking met nasionale nuusdiens Ritzaus Bureau en die dagblad Jyllands-Posten, sowel as om daaglikse nuus in Engels aan die Deense Ministerie van Buitelandse Sake, die Europese Kommissie en Jyllands-Posten te lewer.
Die inhoud sal kenmerkend politiek, sakenuus, opvoeding, finansies en algemene nuus insluit. Weekliks sluit die koerant ’n omvattende In & Out vermaaklikheidsgids in, wat in Mei 1998 deur Thomas Dalvang Fleurquin (Gidsredakteur 1998-2008) op die been gebring is.
Behalwe dat die weekblad bestel kan word, kan The Copenhagen Post ook by koerant-afsetpunte gekoop word of gratis by sekere punte soos die Kopenhaagse Lughawe verkry word. Intekenaars van gedrukte kopieë kan ook ’n wagwoordbeskermde PDF-kopie van die koerant op hul webwerf aflaai.
Nuusargief wysig
The Copenhagen Post-webwerf is in die lente van 1998 aanlyn gebring tydens ’n kort landswye staking wat die druk van ’n koerant onmoontlik gemaak het. Die argief bied 'n leser die geleentheid om al die artikels wat vir die koerant geskryf was, te lees– ongeag of dit in die gedrukte uitgawe verskyn het of nie. Dit maak www.cphpost.dk die grootste Engelstalige databasis ter wêreld wat onlangse Deense nuus en gebeurtenisse betref.