The Power of the Dog
The Power of the Dog is 'n 2021 internasionaal vervaardigde rolprent geskryf en geregisseer deur Jane Campion en met Benedict Cumberbatch, Kirsten Dunst, Jesse Plemons, Thomasin McKenzie, Kodi Smit-McPhee en Frances Conroy. Die rolprent is gegrond op die gelyknamige roman deur die Amerikaanse skrywer Thomas Savage. Die film het op 2 September 2021 by die Venesiese rolprentfees begin en word later in 2021 op Netflix gestroom.
| 'The Power of the Dog' | |
|---|---|
| Regisseur | Jane Campion |
| Draaiboek | Jane Campion (gebaseer op The Power of the Dog deur Thomas Savage) |
| Musiek deur | Jonny Greenwood |
| Kinematografie | Ari Wegner |
| Redigeerder | Peter Sciberras |
| Ateljee | New Zealand Film Commission Cross City Films BBC Film See-Saw Films Bad Girl Geek Max Films Brightstar |
| Verspreider | Transmission Films (Australië and Nieu-Seeland) Netflix (Wêreldwyd) |
| Speeltyd | 126 minute |
| Land | Nieu-Seeland Australië Verenigde Koningkryk Verenigde State Kanada |
| Taal | Engels |
| Begroting | $30–39 miljoen[1] |
| IMDb-profiel | |
Storie wysig
Die rolprent speel af in die 1920's en fokus op Phil en George Burbank, twee ryk Montana-broers. Phil is briljant en wreed, terwyl George saggeaard is. Saam besit hulle die grootste plaas in die vallei. Wanneer George in die geheim met die plaaslike weduwee Rose trou, begin 'n woedende Phil 'n wrede oorlog om haar te vernietig.[2] Rose se seun Peter besluit om Phil met miltsiekte van 'n kadawer te besmet, waarna Phil sterf.
Rolverdeling wysig
- Benedict Cumberbatch as Phil Burbank
- Kirsten Dunst as Rose
- Jesse Plemons as George Burbank
- Thomasin McKenzie as Lola
- Keith Carradine as Governor Edward
- Frances Conroy as ou vrou
- Kodi Smit-McPhee as Peter
- Adam Beach as Edward Nappo
Vervaardiging wysig
In Mei 2019 is aangekondig dat Jane Campion 'n nuwe film sou regisseer en dat dit 'n verwerking van Thomas Savage se roman The Power of the Dog sou wees. Campion het gesê nadat sy die roman gelees het, het sy aan die storie bly dink, en dat die temas van manlikheid, nostalgie en verraad, ’n bedwelmende mengsel is. Sy was dus vasbeslote om die roman op die grootskerm te laat lewe.[3]
Opnames het op 10 Januarie 2020 in Otago begin.[4] Die produksie van die film is gestaak weens die Covid-19-pandemie. Nadat toestemming bekom is is produksie op 22 Junie hervat.[5]
Vrystelling wysig
In Junie 2021 is aangekondig dat die rolprent by die Venesiese rolprentfees sou première, waar die film aan die internasionale kompetisie vir die Goue Leeu sou meeding.
Variety het berig dat die rolprent voorheen genooi is na 'n wêreldpremière by die Cannes-rolprentfees, om buite die kompetisie vertoon te word. Die Cannes-regulasies bepaal dat rolprente nie aan die internasionale kompetisie kan deelneem as die rolprent nie in rolprentteaters verskyn nie, wat Netflix-films nie in aanmerking kom nie. Vir Netflix was dit nie 'n opsie om buite die kompetisie vertoon te word nie, daarom het hulle Venesië gekies.[2]
Interpretasie van die titel wysig
Die betekenis van die titel The Power of the Dog word duidelik in die laaste oomblikke van die film, waartydens Peter 'n Bybelvers lees. Tog bly die presiese betekenis van die titel oop vir verskeie interpretasies.
Na Phil se dood kan Peter gesien word waar hy op sy bed sit en die Bybel lees. In die teks wat hy lees is die titel van die film, gevind in die boek Psalms, hoofstuk 22: "Deliver my soul from the sword; my darling from the power of the dog". ("Verlos my siel van die swaard; my liefling van die mag van die hond.")
Die eerste en mees ooglopende interpretasie is dat Phil die "hond" is en die res van die karakters is deur sy dood uit sy mag gered. Phil se krag is nie eksplisiet nie, maar eerder geïmpliseer: George loop op eierdoppe, nie in staat om sy ware gevoelens of gedagtes te openbaar nie uit vrees om gespot te word; Rose verval in alkoholisme deur teistering, en die saggeaarde Peter word 'n moordenaar. Mag is dus hoofsaaklik sielkundig en nie fisies nie.
Die "liefling" uit die psalm wat gered moet word, verwys blykbaar na Rose. Hierdie idee word bevestig deurdat Peter in die film sê hy wil sy ma red en word verder versterk in die slottoneel waar Peter vanuit sy kamer op Rose en George afkyk nadat hy die psalm gelees het en sien hoe sy ma en George mekaar liefdevol omhels.
Die liefling kan ook na Petrus self verwys, aangesien Peter ná Phil se dood van sy mag bevry word.
Nog 'n interpretasie is dat die liefling na Phil self verwys. ’n Vroeëre toneel wys hoe Peter die nek van ’n beseerde konyn wat hy saam met Phil gevind het, genadeloos breek. Dit lyk asof hierdie toneel Phil se moord voorafskadu, met Peter wat Phil uit genade vermoor het om hom van 'n lewe van verlange en pyn te red. In hierdie interpretasie is Phil se begeerte en pyn die “hond”.
Hierdie laasgenoemde interpretasie blyk bevestig te word in 'n onderhoud wat deur regisseur Jane Campion gegee is: "[...] in 'n sekere sin is seksualiteit soos menslike lyding. Soos die titel lui, is dit 'n soort waarskuwing. Die krag van die hond is al daardie diep onbeheerbare drange wat kom om ons te vernietig".[6][7][8]
Ontvangs wysig
Resensies wysig
Op Rotten Tomatoes gee 96% van 231 beoordelaars die rolprent 'n positiewe resensie, met 'n gemiddelde telling van 8,6/10. Die film is gemerk as "gesertifiseerd vars". Die konsensus lui: "Die lewe gebring deur 'n ster-ensemble gelei deur Benedict Cumberbatch, The Power of the Dog bevestig die skryfster-regisseuse Jane Campion as een van haar generasie se beste filmmakers").[9] Webwerf Metacritic bereik 'n telling van 89/100, gebaseer op 56 resensies, wat staan vir "universele lof". Die film is gemerk "Moet sien".[10]
Verwysings wysig
- ↑ Keegan, Rebecca (10 September 2021). "Jane Campion on 'The Power of the Dog's Toxic Masculinity and Why She Won't Make a Marvel Movie". The Hollywood Reporter. Besoek op 11 November 2021.
- ↑ 2,0 2,1 Elsa Keslassy, Jane Campion’s Netflix Film ‘The Power of the Dog’ to World Premiere at Venice, Variety, 10 Junie 2021
- ↑ Justin Kroll, Benedict Cumberbatch, Elisabeth Moss to Star in Jane Campion’s New Film, Variety, 6 Mei 2019
- ↑ Work starts on Netflix drama in Maniototo, Otago Daily Times, 10 Januarie 2020
- ↑ Tom Hunt, Jane Campion movie starring Cumberbatch, Dunst is second film allowed in, Stuff, 18 Junie 2020
- ↑ Lindsay Kusiak, The Power Of The Dog Title Meaning & Final Bible Verse Explained, Screen Rant, 4 Desember 2021
- ↑ Lewis Knight, Power of the Dog ending explained: What happened to Phil Burbank?, Radio Times, 3 Desember 2021
- ↑ Anne Thompson, ‘The Power of the Dog’: Why Jane Campion Will Become the Third Woman to Win the Directing Oscar, IndieWire, 4 Desember 2021
- ↑ Rotten Tomatoes, The Power of the Dog, besoek op 5 Desember 2021
- ↑ Metacritic, The Power of the Dog, besoek op 5 Desember 2021