Thembelihle Plaaslike Munisipaliteit

Thembelihle
Kaart van Suid-Afrika wat Thembelihle in Noord-Kaap aandui
Provinsie Noord-Kaap
Distriksmunisipaliteit Pixley ka Seme
Tipe Plaaslike Munisipaliteit
Munisipale kode NC076
Hoofstad Hopetown
Grootste tale Afrikaans, Xhosa
Area 8 023 km²  
Bevolking 15,701 (2011)

Die Thembelihle Plaaslike Munisipaliteit (voorheen bekend as die Oranje-Karoo Plaaslike Munisipaliteit) is een van die plaaslike munisipaliteite in die Pixley ka Seme-distriksmunisipaliteit in die Noord-Kaap, Suid-Afrika.

Geskiedenis wysig

In 2000 wou die Noord-Kaapse regering die Hopetown Verteenwoordigende Raad, die Strydenburg Verteenwoordigende Raad en die Orania Verteenwoordigende Raad laat saamsmelt in die nuwe Oranje-Karoo Plaaslike Munisipaliteit. Die Orania Verteenwoordigende Raad en die Orania Inwonersvereniging het daarna die Noord-Kaapse regering voor die Noord-Kaapse Hooggeregshof in Kimberley gedaag. Die Suid-Afrikaanse regering, die Noord-Kaapse regering en ander het toe 'n skikking met die Orania Verteenwoordigende Raad getref, waarin bepaal is dat

  1. die Orania Verteenwoordigende Raad nie sal ophou bestaan deur die inwerkingtreding van die Wet op Munisipale Stelsels van 1998 nie,
  2. die Orania Verteenwoordigende Raad met al sy bevoegdhede bly bestaan totdat daar 'n ooreenkoms is tussen die inwoners van Orania en die Suid-Afrikaanse regering oor die munisipale status van Orania en
  3. Orania binne die grense van die Thembelihle Plaaslike Munisipaliteit val, maar dat die die Thembelihle Plaaslike Munisipaliteit in Orania geen bevoegdhede het of dienste sal lewer nie.

Hierdie skikking is op 4 Desember 2000 deur die Noord-Kaapse Hooggeregshof bekragtig.

In 2004 is die naam van die Oranje-Karoo Plaaslike Munisipaliteit gewysig in Thembelihle Plaaslike Munisipaliteit.

In Desember 2011 het die opposisie 'n meerderheid in die munisipale raad verkry, toe die ANC 'n tussentydse verkiesing verloor het. Die wyk het na 'n onafhanklike kandidaat gegaan. Hierdie onafhanklike raadslid, Danny Jonas wat voorheen ook lid van die ANC was, het toe die nuwe burgemeester geword. Hy is toe gesteun deur die Demokratiese Alliansie en die Congress of the People.

Danny Jonas het tydens sy burgemeesterskap lid geword van die EFF. Ook het hy in 2016 tydens 'n onderhoud met die SAUK gesê hy en die EFF sal geen 'Boerestaat' (verwysing na Orania) in die munisipaliteit duld nie as die EFF die munisipale verkiesings in Thembelihle sou wen. Die EFF het 'n paar dae later verassingsbesoek aan Orania gebring. 'n Week later het Jonas egter in 'n gesamentlike verklaring met Orania gesê dat Orania 'n positiewe bydrae lewer aan die omgewing. Jonas het ook gevra of die Thembelihle Plaaslike Munisipaliteit met die Orania Verteenwoordigde Raad kan saamwerk, sodat Orania se kennis ook in Hopetown en Strydenburg gebruik kan word.

Die uitslag van die Suid-Afrikaanse munisipale verkiesing van 2016 was dat die ANC sy meerderheid in die munisipale raad van Thembelihle weer teruggekry het.

Nedersettings wysig

Nedersettings in die munisipaliteit:

Orania is slegs in geografiese opsig deel van die Thembelihle Plaaslike Munisipaliteit. Orania het sy eie politieke raad in die vorm van die Orania Verteenwoordigende Raad en lewer ook sy eie dienste.

Setels wysig

party 2000 2006 2011 2016
ANC 4 5 4 4
DA 3 2 1 2
Cope - - 2 -
EFF - - - 1

Die inwoners van Orania stem nie in die munisipale verkiesings vir de raad van Thembelihle nie. Die inwoners van Orania stem vir die Orania Verteenwoordigende Raad.