Tour Montparnasse
Tour Montparnasse is die tweede hoogste wolkekrabber (naas die Tour First) in Frankryk - en die enigste in die stadsgebied van Parys, geleë in die Quartier Necker in die 15de arrondissement (stadsdistrik). Die gebou is in 1972 voltooi en het 'n hoogte van 210 meter en 59 verdiepings. Die wolkekrabber is ontwerp en gebou tydens 'n periode van snelle groei en skaars kantoorruimte in Parys, maar was as 'n monolitiese swart toringgebou in 'n sentrale kwartier met histories lae gebouhoogtes en helder fasades van begin af omstrede - ondanks die destydse staatspresident Georges Pompidou se steun vir die projek. Vervolgens is die oprigting van nuwe toringgeboue met meer as sewe verdiepings vier dekades lank verbied en het kwartiere met wolkekrabbers derhalwe net buite die stadsgrens, so in La Défense, ontstaan waar hulle nie die uitsig op die sentrale element van Parys se stadshorison, die Eiffeltoring, kan belemmer nie.
Die Tour Montparnasse se uitsigdek, geleë op 'n hoogte van 210 meter, bied 'n panoramiese uitsig oor die Paryse stadsgebied wat in goeie weerstoestande sowat veertig kilometer ver kan strek.
In 2017 is besluit om die wolkekrabber van 'n volledig nuwe fasetryke glasfasade te voorsien - met die oog op die Olimpiese Somerspele 2024 wat in Parys gehou sal word.[1][2]
Fotogalery wysig
Verwysings wysig
- ↑ Architectural Digest, 20 September 2017: Will This Makeover Improve the Reputation of Paris's Most Hated Building? Besoek op 3 Maart 2019
- ↑ "nouvelle AOM. Besoek op 3 Maart 2019". Geargiveer vanaf die oorspronklike op 20 Februarie 2019. Besoek op 3 Maart 2019.
Eksterne skakels wysig
Wikimedia Commons het meer media in die kategorie Tour Montparnasse.
