Trans-Kalahari-Grootpad
Die Trans-Kalahari-Grootpad (Engels: Trans-Kalahari Highway) is 'n belangrike hoofroete wat Namibië deur Botswana met Suid-Afrika en Mosambiek verbind.
Met die beplanning en konstruksie is daar in die vooruitsig gestel dat dit die belangrikste handels- en vervoerroete deur die Kalahari-woestyn sou word.
Tot die einde van die twintigste eeu, was die roete slegs 'n grondpad op meeste dele, maar sedert 1998 begin nuwe teerpaaie die verbindings vorm tussen Walvisbaai en Swakopmund aan die Atlantiese Oseaan met Maputo aan die Indiese Oseaan.
Die Trans-Kalahari-Grootpad word insgelyks vir heelwat privaat- en toeristeverkeer gebruik aangesien die nuwe pad van Windhoek na Johannesburg die afstand oor die suidelike roete via Upington met ongeveer 400 km verkort het.
Roete gevolg wysig
Vanaf Windhoek volg dit die Namibiese nasionale roete B6 in 'n oostelike rigting deur Gobabis. Dit bereik Botswana by die Buitepos-grenspos. In Botswana word die roete ooswaarts via die A2 gevolg. Ongeveer 150 km verby die grenspos, vurk die pad na noordoos en suidoos; die roete na Suid-Afrika en die Ooskus word in 'n suidelike rigting voortgesit, verby die gehuggies van Kang en Sekoma, voor Jwaneng en Kanye bereik word. Enkele kilometer ná Lobatse verbygesteek is, bereik die grootpad die Pioneer Gate-grenspos tussen Botswana en Suid-Afrika (Skilpadshek genoem aan die Suid-Afrikaanse kant).
Van Skilpadshek af loop die N4 nasionale roete na ongeveer 50 km deur Zeerust en 135 km verder verby Rustenburg, voor die Suid-Afrikaanse hoofstad Pretoria binnegery word.
Vanaf Pretoria ooswaarts volg 'n roete wat as die Maputo-korridor bekend staan. Die N4-snelweg loop verby Witbank, Middelburg en Nelspruit, tot by Komatipoort waar die grens met Mosambiek gekruis word. Die roete deur Mosambiek volg 'n pad wat as die EN4 bekend staan. Slegs 80 km verder op die EN4 word die Mosambiekse hoofstad Maputo bereik.
 | Hierdie vervoerartikel is 'n saadjie. Jy kan Wikipedia help deur dit uit te brei. |