Villa Diodati is 'n herehuis op 'n landgoed in Cologny, 'n dorp aan die Meer van Genève in Switserland wat bekendheid verwerf het nadat die Engelse digter Lord Byron dit gehuur en die somer van 1816 daar met sy lyfarts en aspirantskrywer John William Polidori deurgebring het. Mary Shelley (destyds nog Mary Wollstonecraft Godwin, al het Mary haarself reeds Mrs Shelley genoem - die paar sou eers in Desember, ná die selfmoord van Percy se verlate vrou Harriet, in die huwelik tree) en Percy Bysshe Shelley, wat saam met hul vier maande oue seun William 'n kamer in die nabygeleë Geneefse Hôtel d'Angleterre gehuur het, was gereelde besoekers. Hul reis na Switserland en hul ontmoetings met Lord Byron is bemiddel deur Mary se stiefsuster, Claire Clairmont, wat die twee vergesel het. Claire was Lord Byron se Londense geliefde en op dié tydstip swanger met sy kind. Byron het geen belang meer gestel in Claire nie, maar hegte vriendskapsbande aangeknoop met Percy Bysshe Shelley.[1]

Villa Diodati
'n Storm nader die Meer van Genève
Die meer ná 'n donderbui

As gevolg van slegte weersomstandighede met dramatiese donderstorms en oorstromings, met dae van duisternis en donkerheid - dit was die Jaar sonder somer - het die groep in Junie 1816 drie dae lank in Villa Diodati gekuier. Met dié byeenkoms het hulle literêre geskiedenis geskryf nadat twee van die verhale, wat hulle vir mekaar geskryf en voorgedra het, tot baanbrekende werke binne die Gotiese grugenre ontwikkel is: Mary Shelley se Frankenstein en John William Polidori se The Vampyre, die eerste moderne vampierverhaal.

Die herehuis is vernoem na 'n invloedryke Geneefse familie van Italiaanse afkoms wat - as aanhangers van die Reformasie - in die 16de eeu vanuit Lucca in Toskane na Switserland gemigreer het. In 1710 het ene Gabriel Diodati die landgoed in Cologny gekoop om hier 'n nuwe herehuis te laat bou.[2]

Verwysings wysig

  1. "Keats-Shelley House: Romanticism - Timeline: 1816. Besoek op 23 Mei 2017". Geargiveer vanaf die oorspronklike op 8 Mei 2017. Besoek op 23 Mei 2017.
  2. Historisches Lexikon der Schweiz: Diodati. Besoek op 6 Maart 2017

Eksterne skakels wysig