Vlag van Albanië

Die nasionale vlag van Albanië (Albanees: Flamuri i Shqipërisë) is op 7 April 1993 amptelik in gebruik geneem. Die vlag vertoon 'n enkele rooi baan met die silhoeët van 'n tweekopadelaar (in swart) in die middel. Die vlag is gekies in 1912 nadat Albanië sy onafhanklikheid van die Ottomaanse Ryk verkry het.

Vlag van Albanië

Vlag van Albanië
Bynaam	Flamuri Kombëtar
Gebruik	Nasionale vlag en Staatsvaandel
Verhouding	5:7
Goedgekeur	7 April 1993
Ontwerp	'n Rooi agtergrond met 'n swart tweekopadelaar in die middel.
Ontwerp deur	Sadik Kaceli

Ontwerp

Simboliek

'n Wapperende vlag van Albanië

Die rooi verteenwoordig dapperheid en krag, terwyl die tweekopadelaar die soewereine staat van Albanië verteenwoordig. Die tweekopadelaar is 'n ou simbool wat al in die Bisantynse Ryk, die Heilige Romeinse Ryk, Oostenryk-Hongarye en die Russiese Ryk gebruik is. Die adelaar verwys na die Albanese volk, aangesien Albanië in Albanees (Shqipëri of Shqipëria) “land van die adelaar” of “volk van die adelaar” beteken.

Kleurskema

Die kleurskema word hieronder gelys:

Kleurskema	Rooi	Swart
CMYK	0/100/100/0	0/0/0/100

Geskiedenis

Wapen van die edelfamilie Kastrioti. Volgens oorleweringe het Gjergj Kastriot Skanderbeg in Krujë 'n rooi vlag met die swart adelaar gehys.

Gedurende Johannes Hunyadi se veldtog in Niš in 1443 het Skanderbeg en 'n paar ander Albanese van die Turkse range weggestap en het hy vir 25 jaar merkwaardige oorwinnings teen die Ottomane behaal. Hy het die Bisantynse dubbelkoparendvlag gebruik en sy sonderlinge oorwinnings het aan hom die titel Athleta Christi, deur die pous toegeken, verleen. Die arend is in die Middeleeue deur 'n aantal Albanese edelfamilies vir heraldiese doeleindes gebruik, en het 'n simbool van die Albanese geword. Die huis van Kastrioti se wapenskild, waarop 'n swart tweekopadelaar op 'n rooi agtergrond verskyn, het bekendheid verwerf toe hy 'n opstand teen die Ottomaanse Ryk gelei het, wat uitgeloop het op die onafhanklikheid van Albanië van 1443 tot 1479. Dit was die vlag van die Liga van Lezhë wat die eerste verenigde Albanese staat in die Middeleeue was, en ook die oudste verteenwoordigende politieke liggaam in die land met nog bestaande rekords.

Die simbool van die tweekopadelaar is gedurende die 18de, 19de en vroeg-20ste eeue deur Albanese nasionaliste gebruik as 'n simbool van hul veldtog vir hulle land se onafhanklikheid van die Ottomaanse Ryk. Op 28 November 1912 is die Albanese onafhanklikheid in Vlorë verklaar en die vlag, wat deur Ismail Qemali gehys is, is as die simbool van die nuwe volk aanvaar.

Die Albanese vlag het deur die jare 'n aantal veranderinge ondergaan soos verskillende bewinde dit aangepas het. Gedurende die heerskappy van Koning Zog (1928 tot 1939) is 'n kroon tot die vlag toegevoeg wat gedurende die Italiaanse besetting van Albanië (1939 tot 1943) deur twee bylbundels vervang is. Na afloop van die Tweede Wêreldoorlog het die kommunistiese regering 'n vyfpuntige goue ster tot die vlag toegevoeg wat weer op 7 April 1992 verwyder is toe dié regering tot 'n val gekom het.

Albanië se maritieme vlae – die burgerlike en vlootvaandels – verskil albei van die nasionale vlag. Die burgerlike vaandel bestaan uit drie horisontale bane in rooi, swart en rooi. Die vlootvaandel is soortgelyk aan die nasionale vlag behalwe dat dit die tweekopadelaar op 'n wit agtergrond is en dat die onderste helfte van dei vlag 'n rooi horisontale baan het. Die adelaar op die Albanese vlag verskyn ook op die muntkant van die Albanese vyflekmunt wat in 1995 en 2000 uitgereik is.

Sedert 1969 is die vlag van Albanië nieamptelik in Kosovo vertoon deur die land se etniese Albanese bevolking. Dit was in die 1990’s die simbool van die nieerkende Republiek Kosovo. Die huidige onafhanklike staat van Kosovo gebruik 'n ander vlag wat ontwerp is om enige simbole te vermy wat met 'n spesifieke etniese groep verbind word (soos die vlae van Bosnië en Herzegowina en Siprus ook doen).

Vorige vlae

• 
  Vlag wat gedurende die nasionalistiese herlewing in die 19de en 20ste eeue gebruik is
• 
  Vlag van die onafhanklike Albanië, 1912 tot 1914
• 
  Alternatiewe vlag van die onafhanklike Albanië, 1912 tot 1914
• 
  Vlag van die Vorstedom Albanië, 1914 tot 1920
• 
  De facto vlag van die Vorstedom Albanië, 1914 tot 1915
• 
  Vlag van die Vorstedom Albanië, 1920 tot 1925 en die Albanese Republiek, 1926 tot 1926
• 
  Vlag van die Albanese Republiek, 1926 tot 1928
• 
  Vlag van die Koninkryk Albanië, 1928 tot 1939
• 
  Vlag van die Italiaanse Protektoraat Albanië, 1939 tot 1943
• 
  Vlag van Albanië tydens die Duitse besetting, 1943 tot 1944
• 
  Vlag van die Demokratiese Regering van Albanië, 1944 tot 1946
• 
  Vlag van die Volksrepubliek Albanië, 1946 tot 1976 en die Sosialistiese Volksrepubliek Albanië, 1976 tot 1992
• 
  Vlag van Albanië, 1992 tot 2002

Ander vlae

Vlae en standaarde

• 
  Burgerlike vaandel van Albanië
• 
  Vlootvaandel van Albanië
• 
  Regeringsvaandel van Albanië
• 
  Kuswagvaandel van Albanië
• 
  Vlag van die president van Albanië
• 
  Vlag van die Albanese polisie

Vorige vlae en standaarde

• 
  Burgerlike vaandel, 1945 tot 1992
• 
  Oorlogsvlag ter see, 1946 tot 1954
• 
  Oorlogsvlag ter see, 1954 tot 1958
• 
  Oorlogsvlag ter see, 1958 tot 1992
• 
  Diensvlag ter see, 1958 tot 1992
• 
  Vlag van die kuswag, 1958 tot 1992
• 
  Presidensiële standaard, 1946 tot 1992
• 
  Presidensiële standaard, 1992 tot 2002

Diverse

• 
  Vlag van die Albanese Moslems in die eerste kwart van die 19e eeu
• 
  Latynse, meestal Albanese koopvaardyvlag van Ottomaans Albanië, 1453 tot 1793
• 
  Vlag van die Sentraal-Albanese Republiek, 'n kortstondige nieerkende republiek, 1913 tot 1914
• 
  Vlag van die outonome Albanese Republiek Korçë, 1916 tot 1920
• 
  Vlag van die Republiek Mirdita, 'n kortstondige nieerkende republiek, 1921
• 
  Vlag van die Italiaanse protektoraat Albanië met die kroon van die Huis van Savoje
• 
  Vlag van die Albanese minderheid in Joego-Slawië (Sosialistiese Outonome Provinsie Kosovo)
• 
  Vlag van die Republiek Kosovo, 'n selfverklaarde staat in 1992 op die grondgebied van die provinsie Kosovo en Metohija (Serwië)
• 
  Vlag van Dardania wat gebruik is as vlag van Kosovo en presidensiële vlag onder UNMIK, ontwerp deur Ibrahim Rugova.
• 
  Vlag van Kosovo (2008–), verteenwoordig die Kosovaarse Albanese en die vyf minderhede in Kosovo

Bronne

• (en) Elsie, Robert (2010). Historical Dictionary of Albania. Lanham, MD: Scarecrow Press (The Rowman & Littlefield Publishing Group Incorporated). ISBN 0-8108-6188-7.
• (en) Elsie, Robert (2001). A Dictionary of Albanian Religion, Mythology, and Folk Culture. New York, NY: New York Universiteitspers. ISBN 0-8147-2214-8.
• (en) Grumeza, Ion (2010). The Roots of Balkanization: Eastern Europe C.E. 500–1500. Lanham, MD: Universiteitspers van Amerika. ISBN 0-7618-5134-8.
• (en) Malcolm, Noel (1998). Kosovo: A Short History. Londen: Macmillan. ISBN 0-333-66612-7.
• (en) Matanov, Christo (2010). The Oxford Encyclopedia of Medieval Warfare and Military Technology. Oxford: Oxford Universiteitspers. ISBN 978-0-19-533403-6.
• (en) Mucha, Ludvík; Crampton, William; Louda, Jiří (1985). Webster's Concise Encyclopedia of Flags & Coats of Arms. New York, NY: Crescent Books. ISBN 0-517-49951-7.
• (en) Pickard, Rob; Çeliku, Florent (2008). Analysis and Reform of Cultural Heritage Policies in South-East Europe. Straatsburg: Raad van Europa Uitgewers. ISBN 978-9-28-716265-6.
• (de) Schmitt, Oliver Jens (2009). Skanderbeg: Der neue Alexander auf dem Balkan. Regensburg: Verlag Friedrich Pustet. ISBN 978-3-7917-2229-0.
• (sq) Frashëri, Kristo (2002). Gjergj Kastrioti Skënderbeu: Jeta dhe Vepra, 1405–1468. Tirana, Albanië: Botimet Toena. ISBN 99927-1-627-4.

Eksterne skakels

• (en) Albanië by Flags of the World.
• (en) "Flag of Albania". Encyclopædia Britannica. Besoek op 20 Oktober 2020.