Wikipedia

Vlag van Hawaii

Die vlag van Hawaii is op 20 Mei 1845 in gebruik geneem. Die vlag vertoon agt horisontale bane in wit, rooi en blou afwisselend met ’n Union Jack in die skildhoek.

Vlag van Hawaii
Vlag van Hawaii
Vlag van Hawaii
Bynaam Ka Hae Hawaii
Gebruik Burgerlike- en Staatsvlag Burgerlike en staatsvlag
Verhouding 1:2
Goedgekeur 20 Mei 1845[1]
Ontwerp Agt horisontale bane in wit, rooi en blou afwisselend met ’n Union Jack in die skildhoek.

Ontwerp wysig

 
Die vlag van Hawaii in Haleakalā Nasionale Park

Die skildhoek van die vlag van Hawaii bevat die Union Jack van die Verenigde Koninkryk. Die res van die vlag bevat agt horisontale bane wat die agt grootste eilande voorstel, nl. Hawaii, Oahu, Kauai, Kahoolawe, Lanai, Maui, Molokai en Niihau. ’n Negende baan is op ’n tyd bygevoeg om die eiland Nihoa voor te stel. Ander weergawes van die vlag het slegs sewe bane wat al die eilande met die uitsondering van Kahoolawe of Niihau voorstel. Die kleure van die bane. van bo na onder is in die volgorde wit-rooi-blou-wit-rooi-blou-wit-rooi. Die kleure is in 1843 gestandaardiseer maar ander kombinasies is gebruik in die verlede en word vandag soms nog gebruik.[2][3]

Geskiedenis wysig

 
Vlag van die Britse Oos-Indiese Kompanjie

Daar is verskeie vertellings van die vroeë geskiedenis van die vlag van Hawaii. Een vertel hoe koning Kamehameha I ’n Britse vlag, waarskynlik ’n Rooi vaandel, gehys het wat aan hom deur die Britse ontdekkingsreisiger George Vancouver gegee is as teken vriendskap met koning George III. Besoekers aan die eilande het die vlag gesien wapper by eerbiebwaardige plekke. ’n Raadgewer van Kamehameha het opgemerk dat die Union Jack daarvoor verantwoordelik kan wees dat Hawaii betrokke kan raak by internasionale konflik omdat die koninkryk gesien kan word as bondgenoot van die Verenigde Koninkryk. Kamehameha het gevolglik die vlag oor sy huis by Kamakahonu gestryk. Hoewel die historiese akkuraatheid van die verhaal in twyfel getrek word, word ook vertel dat ’n Amerikaanse vlag by Kamehameha se huis gesien is om Amerikaanse belange te paai gedurende die oorlog van 1812, maar dat dit verwyder is toe Britse offisiere ernstig daarteen kapsie gemaak het. Dit verduidelik waarom die gevolglike vlag van Hawaii ’n doelbewuste versmelting van die twee lande se vlae was.[4]

In 1816 het Kamehameha opdrag gegee vir die ontwerp van ’n eie vlag om konflik te vermy. Hierdie vlag het die basis gevorm vir die huidige ontwerp. Dit vlag is waarskynlik ontwerp deur een va die kommandeurs van die Koninklike Hawaiise Vloot. Hulle was voormalige offisiere van die Britse Koninklike Vloot wat Kamehameha van raad voorsien het en die vlag is gebaseer op ’n vorm van die Britse vlootvlag. Daar is onenigheid oor die werklike ontwerper: dit kon òf Alexander Adams òf George Beckley gewees het. Die ontwerp was soortgelyk aan die vlag van die Britse Oos-Indiese Kompanjie wat in dié tyd gebruik is maar wat net rooi en wit bane gehad het. Kaptein Adams het hierdie vlag vir die eerste keer gebruik op ’n Hawaiise handelsending na China in 1817.[5]

Die oorspronklike vlag is ontwerp om afwisselende bane in rooi-wit-blou te hê en die kleure kan toegeskryf word aan die vlag van die Verenigde Koninkryk. Die vlag wat gedurende die eerste amptelike vlaghysing gebruik is het verkeerdelik die kombinasie in wit-rooi-blou gehad,[1] maar dit blyk of ontdekkingsreisigers wat die eilande besoek het tot die 1840’s verskillende weergawes het van die presiese volgorde van die kleure en die aantale bane. Daar was moontlik verskillende weergawes van die vlag met verskillende kleurvolgordes en aantal bane.[6] Die aantal bane het ook verander: aanvanklik is die vlag ontwerp met òf sewe òf nege horisontale bane en in 1845 is dit amptelik na agt bane verander. Dit is vandag nog in gebruik.[4]

  •  
      Britse Rooi vaandel, 1793 tot 1794
  •  
      Union Jack (waarskynlik nie in 1801 opgedateer nie), 1794 tot 1816
  •  
      Union Jack (gedurende die ), Februarie 1843 tot Julie 1843
  •  
      Vorige weergawe van die huidige vlag, 1816 tot Februarie 1843 en Julie 1843 tot Mei 1845
  •  
      Vlag van die VSA (na die omverwerping van die Koninkryk van Hawaii), Februarie 1893 tot April 1893
  •  
      Vorige weergawe van die huidige vlag, 1896
  •  
        Vorige alternatiewe vlag van Hawaii, 1898 tot 1959
  •  
      Alternatiewe vlag van Hawaii

Ka Hae Hawaii-dag wysig

In 1990 het John D. Waihee III, goewerneur van Hawaii, 31 Julie as Ka Hae Hawaii-dag oftewel Hawaiiaanse Vlagdag verklaar. Sedertdien is dit elke jaar gevier.[7]

Ander vlae wysig

  •  
    Persoonlike standaard van koning Kalakaua
  •  
    Persoonlike standaard van prinses Kaiulani
  •  
    Vlagkaart van 1868
  •  
    Hawaiise vlagkwilt van Waimea, voor 1918
  •  
    Vlag van die Stad Honolulu
  •  
    Ka Lahui Hawaii

Vlag van die Goewerneur wysig

Die vlag wat deur die goewerneur van Hawaii gebruik word is ’n tweekleur in blou en rooi. Daar is agt wit vyfpuntige sterre in ’n sirkelvorm om die naam van die deelstaat (in hoofletters). Gedurende die tyd wat Hawaii ’n deelgebied van die VSA was, was die letters “TH” (vir “Territory of Hawaii”) in die middel van die vlag.[8]

  •  
    Standaard van die goewerneur voor 1959
  •  
    Standaard van die goewerneur van Hawai’i

Kanaka Maoli-vlag wysig

 
Kanaka Maoli-vlag

Daar word soms aanspraak gemaak dat die Kanaka Maoli (“ware mense” in Hawaiiaans) se vlag die oorspronklike vlag van die koninkryk van Hawai’i is. Vir sommiges simboliseer hierdie vlag die inheemse Hawaiianers omdat die huidige Hawaiiaanse vlag, ’n kombinasie van Britse en Amerikaanse simboliek, beelde van kolonialisme oproep.[9] Die kleure is rooi, groen en geel en was volgens oorlewering Kamehameha se persoonlike vlag en is weer deur Kamehameha III ingevoer. Die sentrale ontwerp is ook teenwoordig in die amptelike wapenskild van die koninkryk van Hawaii.

Gene Simeona van Honolulu beweer dat hy die “oorspronklike” Hawaiiaanse groen, rooi en geel gestreepte vlag wat deur kaptein Lord George Paulet van die Britse vloot vernietig is toe hy in 1843 Hawaii vir vyf maande beset het, herskep het. Simeona sê dat ’n afstammeling van Paulet wat hy in 1999 op die gronde van Iolani-paleis ontmoet het, aan hom genoem het dat die huidige Hawaiiaanse vlag nie die oorspronklike is nie. Simeona sê hy het die ontwerp in die Hawaiiaanse Staatsargief opgespoor.[9] Tot op datum is daar egter geen bewyse in Hawaiiaanse koerante, historiese optekenings of enige regeringsdokumentasie van daardie era vir Simeona se bewerings bevind nie. Daar is beweer dat die Jamaikaanse gewilde reggae-musiekbeweging die ooglopende invloed vir die vlag is.[10]

In die middel van die vlag is ’n skild waarop ’n wapenskild van die kanaka maoli is en dit bestaan uit die koninklike kahili, die oorspronklike Hawaiiaanse koninklike standaard. Twee spane is gekruis oor hierdie kahili wat die reisende tradisies van die Hawaiiane en Kamehameha se Kānāwai Māmalahoe voorstel. Daar is nege bane, anders as die agt van die huidige staatsvlag van Hawaii, en elk stel ’n eiland van Hawaii voor. Dit is Hawaii, Maui, Kahoolawe, Lanai, Molokai, Oahu, Kauai, Niihau en Nihoa. Hoewel die laaste hiervan onbewoon was, was dit amptelik deel van die koninkryk van Hawaii gedurende die heerskappy van Kamehameha IV. Volgens die voorstaanders van hierdie vlag stel die groen die maka ’ainana (gewone burgers), die grond en goedheid voor; die rooi stel die konohiki (middelklas), genealogie en krag voor; en die geel stel die alii, geestelikheid en paraatheid op gevaar voor.[9] Ander vlae en kleure is voorgestel[11] maar selfs leiers van die Hawaiiaanse Soeweteiniteitsbeweging gebruik dikwels die huidige staatsvlag.[12]

Verwysings wysig

  1. ↑ 1,0 1,1 "Hawaii: geskiedkundige vlae" (in Engels). Flags of the World. Geargiveer vanaf die oorspronklike op 9 Oktober 2019. Besoek op 21 Mei 2019.
  2. ↑ "Naam en kentekens van Hawaii – Staatsvlag" (in Engels). Hawaii Staatsbiblioteek. 1 Maart 2006. Geargiveer vanaf die oorspronklike op 11 Mei 2007. Besoek op 25 Oktober 2007.
  3. ↑ (en) BBC, Januarie 2008
  4. ↑ 4,0 4,1 (en) Quaife, Milo; M.J. Weig; R.E. Appleman (1961). The History of the United States Flag. New York: Harper. p. 154. Besoek op 21 Mei 2019.{{cite book}}: AS1-onderhoud: gebruik authors-parameter (link)
  5. ↑ (en) Henry Whalley Nicholson (1889). From sword to share: or a fortune in five years at Hawaii. W.H. Allen & Co. pp. 83–85. Besoek op 21 Mei 2019.
  6. ↑ (en) Howard M. Ballou (1906). The Reversal of the Hawaiian Flag. pp. 5–11. ISBN 0-8028-5088-X. Besoek op 21 Mei 2019.
  7. ↑ (en) Verklaring van die Hawaiiaanse Vlagdag. URL besoek op 26 Oktober 2007.[dooie skakel]
  8. ↑ "Naam en Kentekens van Hawaii – Goewerneursvlag" (in Engels). Hawaii Staatsbiblioteek. 1 Maart 2006. Geargiveer vanaf die oorspronklike op 11 Mei 2007. Besoek op 25 Oktober 2007.
  9. ↑ 9,0 9,1 9,2 "'Oorspronklike' vlag lok debat uit". The Honolulu Advertiser (in Engels). 12 Februarie 2001. Geargiveer vanaf die oorspronklike op 1 Desember 2019. Besoek op 21 Mei 2019.
  10. ↑ (en) Hawaiiaanse Soewereiniteit: Een van die oorspronklike Hawaiiaanse vlae: Die rooi, geel en groen Hawaiiaanse vlag.
  11. ↑ "Hawaii Ko Aloha-vlag (V.S.)" (in Engels). CRW flag store web site. Geargiveer vanaf die oorspronklike op 18 Oktober 2012. Besoek op 19 Julie 2009.
  12. ↑ "Hawaiiaanse Nasionale Vlag" (in Engels). Webblad van die Hawaiiaanse Koninkryk. Geargiveer vanaf die oorspronklike op 6 November 2019. Besoek op 21 Mei 2019.

Eksterne skakels wysig

Ontsluit van "https://af.wikipedia.org/w/index.php?title=Vlag_van_Hawaii&oldid=2470214"