Wanderers View

Wanderers View is ’n klein voorstad in Johannesburg, sowat 1,2 km noord van die stadsaal.

Wanderers View
Voorstad
Wanderers View  Wanderers View se ligging in Gauteng
Koördinate: 26°11′34″S 28°02′37″O
Land	Suid-Afrika
Provinsie	Gauteng
Munisipaliteit	Stad Johannesburg
Hoofplek	Johannesburg
Stigting	1894
Oppervlak
• Totaal	0,8 km2 (0,3 vk. myl)

Op dié straatplan van Johannesburg van 1897 is die benaderde omvang van Wanderers View verdonker.

Die voorstad beslaan sowat 0,8 km² en word begrens deur Braamfontein in die weste en noorde, Hillbrow in die ooste en Parkstasie in die suide, hoewel Peter Raper in die New Dictionary of South African Place Names skryf die hoofstasie van Johannesburg asook die Eskom-gebou en YMCA val binne die grense van Wanderers View. In die weste van die voorstad, in Jutastraat, was die gebouekompleks van die destyds Gereformeerde kerk Johannesburg-Sentraal, sedert 1997 die tuiste van die Good News Community Church, ook ’n Gereformeerde kerk. Aan die teenoorgestelde kant van Wanderers View en een blok noord van Jutastraat by De Kortestraat 117, net anderkant die grens in Braamfontein, is nou ’n parkeerterrein waar die kerkgebou van die NG gemeente Johannesburg gestaan het tot dit in die dekade ná 2000 gesloop is. Langs dié kerk staan ’n gebou wat dekades lank as die hoofkantoor van die NG Kerk se Sinode van Suid-Transvaal (later Hoëveld genoem) gedien het. Vandat die Sinode verhuis het na Kemptonpark, staan dié gebou as Satawu House bekend.

Wanderers View is uitgelê op die plaas Braamfontein en in 1894 goedgekeur. Die naam is afgelei van die lig naasaan Krugerpark, destyds die Wanderers-sportvelde. Die Wanderers-klub het intussen na Kentpark in Illovo verhuis. In die ou Suid-Afrika, toe dit ’n blanke groepsgebied was, het die voorstad ’n redelike gelykop verdeling van Afrikaanse en Engelse inwoners gehad. Volgens die munisipale kieserslys was hier in 1934 222 Afrikaanssprekende kiesers en 473 Engelssprekendes; en in 1961 was 349 Afrikaans en 236 Engels.

Bronne

• (en) Raper, Peter Edmund. 2004. New Dictionary of South African Place Names. Johannesburg & Cape Town: Jonathan Ball Publishers
• (af) Stals, prof. dr. E.L.P (red.). 1978. Afrikaners in die Goudstad. Deel 1. 1886 - 1924. Kaapstad en Pretoria: HAUM.