Sir William Gerald Golding (19 September 191119 Junie 1993) was 'n Engelse skrywer, digter en ontvanger van die Nobelprys vir Letterkunde (1983).[1] Hy ontvang ook die Booker-prys vir letterkunde in 1980, vir sy roman The Rites of Passage.

William Golding
William Golding in 1983
Gebore
William Gerald Golding

19 September 1911
Newquay, Cornwall, Engeland
Sterf19 Junie 1993
Perranarworthal, Cornwall, Engeland
NasionaliteitVlag van Verenigde Koninkryk Verenigde Koninkryk
BeroepSkrywer van romans, dramas en gedigte
Bekend virLord of the Flies
TitelSir (1988)
Webwerfhttps://william-golding.co.uk/

Vroeëre lewe wysig

Golding is gebore in St Columb Minor, 'n dorp naby Newquay, Cornwall, Engeland. Hy begin reeds op die ouderdom van sewe skryf en leer Kornies praat as 'n jong man.

Sy pa was 'n plaaslike skoolhoof en 'n intellektueel wat liberale politieke oortuigings en 'n sterk geloof in die wetenskap gehad het. Die familie trek na Marlborough en hy gaan skool aan die Marlborough skool. Hy begin in 1930 studeer aan die Oxford Universiteit (Brasenose Kollege) waar hy in die natuurwetenskap en Engels studeer. Sy eerste boek, 'n digbundel word uitgegee voor Golding sy BA graad behaal.

Hy trou met Ann Brookfield, 'n analitiese chemikus in 1939. Golding word 'n onderwyser aan die Bishop Wordsworth Skool in Salisbury waar hy Engels en filosofie aanbied.

Gedurende die Tweede Wêreldoorlog dien hy in die Koninklike vloot en was betrokke by die keldering van Duitsland se grootste slagskip die Bismarck. Hy neem deel aan die inval in Normandië op D-dag en keer na die beeïndiging van die oorlog terug na die onderwys en skryfwerk.

In 1961 het sy suksesvolle boeke Golding in staat gestel om sy onderwyspos te verlaat en hy spandeer 'n jaar as die inwonende skrywer aan die Hollins College in Virginië. Daarna het hy 'n voltydse skrywer geword. Hy het saam met James Lovelock in dieselfde dorp in Wiltshire gewoon, toe Lovelock aan hom sy omgewingsteorie verduidelik het. Dit was Golding wat voorgestel het dat hy dit na Gaia, die Griekse godin van die aarde, moet vernoem.

Fiksie wysig

Golding se dikwels allegoriese fiksie maak gebruik van verwysings na klassieke literatuur, mitologie en Christelike simbolisme. Hoewel daar nie 'n duidelike gemeenskaplike draad deur al sy romans loop nie en hy van verskillende tegnieke gebruik maak, hanteer Golding primêr die menslike boosheid en stel wat algemeen beskryf word as 'n soort donker optimisme in sy werke voor. Golding se eerste roman Lord of the Flies (1954; rolprent 1963 en 1990), stel bekend een van die temas wat gereeld in sy fiksie voorkom naamlik; die konflik tussen die mensdom se inherente barbarisme en die beskawende invloed van rede/rasionaliteit. The Inheritors (1955) gaan terug na die prehistoriese tyd en steun die veronderstelling dat die mensdom se evolusionêre voorouers, die "vuurmakers", die oorhand gekry het oor 'n meer saggeaarde ras deur gebruik te maak van geweld en verraad eerder as net suiwer meerderwaardigheid. In Pincher Martin (1956) en Free Fall (1959), ondersoek Golding fundamentele probleme van bestaan soos oorlewing en menslike vryheid, deur gebruik te maak van droomagtige vertellings en terugflitse. The Spire (1964) is 'n allegorie oor die hoofkarakter se obsessiewe vasberadenheid om 'n katedraaltoring te bou ongeag die gevolge daarvan. Golding se latere romans het nie dieselfde kritiese waardering ontvang as sy vroeëre werke nie. Dié werke sluit in Darkness Visible (1979) en die historiese see trilogie Rites of Passage (1981), Close Quarters (1987), en Fire Down Below (1989).

Latere lewe wysig

Golding ontvang 'n ridderskap van Koningin Elizabeth II in 1988.

William Golding sterf aan 'n hartaanval in sy huis in Perranarworthal, naby Truro, Cornwall op 19 Junie 1993, en word begrawe in Bowerchalke, Wiltshire, Engeland.

Belangrike werke wysig

  • Poems (1934)
  • Lord of the Flies (1954)
  • The Inheritors (1955)
  • Pincher Martin (1956)
  • The Brass Butterfly (1958)
  • Free Fall (1959)
  • The Spire (1964)
  • The Hot Gates (1965)
  • The Scorpion God (1971)
  • Darkness Visible (1979)
  • A Moving Target (1982)
  • The Paper Men (1984)
  • An Egyptian Journal (1985)
  • To the Ends of the Earth [trilogie] – Rites of Passage (1980), Close Quarters (1987) en Fire Down Below (1989)

Verwysings wysig

  1. "The Nobel Prize in Literature 1983" (in Engels). Nobelprize.org. Geargiveer vanaf die oorspronklike op 2 Julie 2018. Besoek op 7 Oktober 2017.

Eksterne skakel wysig