Wsewolod III of Wsewolod die Groot Nes (Russies: Все́волод III Ю́рьевич Большо́е Гнездо́; 1154–1212) was die grootprins van Wladimir. Die stadstaat het gedurende Wsewolod se lang bewind (1177–1212) sy hoogtepunt bereik.
Wsewolod se Christelike naam was Dmitri, en hy het sy paleis se kerk aan sy beskermheilige, sint Dmitri, opgedra.
Wsewolod was die tiende of elfde seun van Joeri Dolgoroeki, wat die dorp Dmitrof gestig het om die plek van sy geboorte te gedenk. Ná Joeri se dood het Wsewolod se ma hom saam met haar na Konstantinopel geneem, waar hy grootgeword het.
Hy het in 1170 uit die Bisantynse Ryk teruggekeer en in 1173 is hy vir ’n rukkie op die troon van Kiëf geplaas. Twee prinse van Smolensk wat die stad ingeneem het, het hom gevange geneem en hy is ’n jaar later vir ’n losprys vrygelaat. Hy het die kant van sy broer Michail van Wladimir gekies in sy stryd teen die bojare van Soezdal en Rostof. Hy het Michail ná sy dood in Wladimir opgevolg.
Hy het die bojare aan sy gesag onderwerp en die Wolga-volke geplunder. Hy het sy marionette op die troon van Nowgorod geplaas en sy dogters met prinse van Tsjernigof en Kiëf laat trou.
Wsewolod het min genade betoon aan diegene wat ongehoorsaam was. In 1180 en 1187 het hy die prinse van Rjazan gestraf deur hulle uit hul lande te verban. In 1207 het hy beide Rjazan en Belgorod laat afbrand. Hy het gou beroemd geword op militêre gebied.
Sy eerste vrou, Maria Sjwarnowna, het verskeie kloosters gestig en godsdienswerk gedoen en is deur die Russies-Ortodokse Kerk tot heilige verklaar. Hulle het minstens 14 kinders gehad en dit het hom die bynaam "Groot Nes" besorg. Vier van hulle – Konstantyn, Joeri, Jaroslaf en Swjatoslaf – het hom as grootprinse opgevolg. Hy is op 12 April 1212 oorlede.
